ഭുവനേശ്വര്‍: ഉത്തര്‍പ്രദേശില്‍ എതിരാളികളെ ഞെട്ടിച്ച് പ്രിയങ്കയെ രംഗത്തിറക്കിയതിനു പിന്നാലെ ബി.ജെ.പി പാളയത്തിലുള്ള വരുണ്‍ ഗാന്ധിയെകൂടി അടര്‍ത്തി കോണ്‍ഗ്രസിലെത്തിക്കാന്‍ രാഹുലിന്റെ അണിയറ നീക്കം. ഇപ്പോള്‍ യു.പിയിലെ സുല്‍ത്താന്‍പൂര്‍ മണ്ഡലത്തിലെ എം.പിയായ വരുണ്‍ ഗാന്ധിക്ക് ഇത്തവണ ബി.ജെ.പി ടിക്കറ്റ് നല്‍കാന്‍ സാധ്യതയില്ലെന്നാണ് വിവരം.

ഇങ്ങനെയെങ്കില്‍ പിതൃസഹോദര പുത്രനായ വരുണിനെ കോണ്‍ഗ്രസിലെത്തിക്കുന്നത് എളുപ്പമാകുമെന്നും രാഹുല്‍ കണക്കു കൂട്ടുന്നു. ഗാന്ധി കുടുംബത്തെ ഒന്നിപ്പിക്കാനുള്ള ശ്രമത്തിന് തടസം മേനകാ ഗാന്ധിയെന്നാണ് വിവരം. എന്നാല്‍ അവര്‍ക്ക് പിലിഭിത്തില്‍ ബി.ജെ.പി സീറ്റ് നിഷേധിച്ചാല്‍ രാഹുലിന്റെ നീക്കം സജീവമാക്കാനാകുമെന്നാണ് രാഹുല്‍ പ്രതീക്ഷിക്കുന്നത്.

അതിനിടയില്‍ ഒഡിഷ സന്ദര്‍ശനത്തിനിടയില്‍ വരുണ്‍ കോണ്‍ഗ്രസിലേക്ക് വരുന്നതുമായി ബന്ധപ്പെട്ട വാര്‍ത്തയെക്കുറിച്ച് മാധ്യമ പ്രവര്‍ത്തകരുടെ ചോദ്യത്തിന് തനിക്ക് അതേക്കുറിച്ച് ഒന്നും അറിയില്ലെന്നാണ് രാഹുല്‍ ഗാന്ധി പറഞ്ഞത്.
ഗാന്ധി കുടുംബം ഒന്നിക്കുന്നുവെന്ന വാര്‍ത്ത പുറത്തു വന്നതിനു പിന്നാലെയാണ് വരുണിന്റെ കോണ്‍ഗ്രസ് പ്രവേശനം സംബന്ധിച്ച അഭ്യൂഹവും ശക്തമായത്.