മുംബൈ: വടക്കുകിഴക്കന്‍ ഡല്‍ഹിയിലെ വംശീയാതിക്രമത്തില്‍ കേന്ദ്രസര്‍ക്കാരിനെ രൂക്ഷമായി വിമര്‍ശിച്ച് ശിവസേന. ഡല്‍ഹി കത്തുകയും നിരവധി പേര്‍ക്കു പേര്‍ക്കു ജീവന്‍ നഷ്ടമാകുകയും പൊതുസ്വത്തിനു വ്യാപകമായ നാശമുണ്ടാകുകയും ചെയ്യുമ്പോള്‍ കേന്ദ്ര ആഭ്യന്തര മന്ത്രി അമിത് ഷാ എന്താണ് ചെയ്യുന്നതെന്നു ശിവസേന ചോദിച്ചു. മുഖപത്രമായ സാമ്‌നയിലൂടെയാണ് ശിവസേന അമിത് ഷായുടെ നിരുത്തരവാദപരനമായ നടപടികളെ ചോദ്യം ചെയ്യുന്നത്.

ഡല്‍ഹിലെ കലാപത്തില്‍നിന്നുള്ള പുകപടലത്തില്‍ നമുക്ക് ഒന്നും കാണാന്‍ കഴിയുന്നില്ല. ആഭ്യന്തര മന്ത്രി അമിത് ഷായെയും എവിടെയും കാണാനില്ല. ഇത് അദ്ദേഹം ആശങ്കപ്പെടേണ്ട ഒന്നാണ്. ഡല്‍ഹി കത്തുമ്പോള്‍ അമിത് ഷാ എവിടെയായിരുന്നു എന്ന ചോദ്യമാണ് ഉന്നയിക്കുന്നത്. അജിത് ഡോവല്‍ റോഡിലിറങ്ങി ജനങ്ങളുമായി സംസാരിക്കുന്നതാണ് കാണുന്നത്. എപ്പോഴാണ് ജനങ്ങള്‍ക്ക് ആഭ്യന്തര മന്ത്രിയെ കാണാനാകുക. തെരഞ്ഞെടുപ്പ് സമയത്ത് ലഘുലേഖകള്‍ വിതരണം ചെയ്യുന്ന അമിത് ഷായെ കണ്ടിരുന്നെന്നും സാമ്‌ന പരിഹസിച്ചു.

ബി.ജെ.പി നേതാക്കളായ അനുരാഗ് താക്കൂര്‍, പര്‍വേഷ് വര്‍മ, കപില്‍ മിശ്ര എന്നിവര്‍ക്കെതിരേ എഫ്.ഐ.ആര്‍ രജിസ്റ്റര്‍ ചെയ്യാന്‍ ഉത്തരവിട്ടതിനുള്ള ശിക്ഷയാണ് ഡല്‍ഹി ഹൈക്കോടതി ജഡ്ജി മുരളീധറിന്റെ സ്ഥലംമാറ്റമെന്നും ശിവസേന പറഞ്ഞു.