തൃശൂര്‍: ആലപ്പുഴ സായി കേന്ദ്രത്തിലെ കായിക അധ്യാപകനെതിരേ ലൈംഗികാരോപണം. ദ്രോണാചാര്യ അവാര്‍ഡ് ജേതാവുകൂടിയായ പരിശീലകനെതിരേയാണ് മുന്‍ ഇന്ത്യന്‍ കായികതാരം കൂടിയായ പെണ്‍കുട്ടിയുടെ മാതാവ് പരാതി നല്‍കിയിരിക്കുന്നത്.

കേന്ദ്രത്തിലെ വിദ്യാര്‍ഥിനിയായ മകളെ പരിശീലിപ്പിക്കണമെങ്കില്‍ മാതാവ് കോച്ചിനു മുമ്പില്‍ വഴങ്ങണമെന്നതായിരുന്നു ഇദ്ദേഹത്തിന്റെ ആവശ്യമെന്നും വഴങ്ങാതായതോടെ മകളെ മാനസികമായി പീഡിപ്പിക്കുകയാണെന്നുമാണ് ഇവര്‍ നല്‍കിയ പരാതിയില്‍ പറയുന്നത്. ജില്ലാ പോലിസ് മേധാവിക്കും സായ് അധികൃതര്‍ക്കുമാണ് പരാതി നല്‍കിയിരുന്നത്. അതേ സമയം പരാതി നല്‍കിയിട്ടും അധികൃതര്‍ പൂഴ്ത്തിയതായും ആരോപണമുണ്ട്.

അതേ സമയം ഇത്തരത്തില്‍ പരാതി ലഭിച്ചതായും പരിശീലകനെതിരേ അന്വേഷണം ആരംഭിച്ചതായി സായ് കേന്ദ്രം ഡയറക്ടര്‍ അറിയിച്ചു. അതേ സമയം മുന്‍ വൈരാഗ്യമാണ് ഈ പരാതിക്കു പിന്നിലെന്നാണ് കായിക പരിശീലകന്റെ പ്രതികരണം. പരാതിക്കാര്‍ക്കെതിരേ മാനനഷ്ടത്തിന് കേസ് നല്‍കുമെന്നും ഇദ്ദേഹം പ്രതികരിച്ചു.