ന്യൂഡല്‍ഹി: ദിവസം നാലഞ്ചായി ഷബാന ആശുപത്രികള്‍ കയറിയിറങ്ങാന്‍ തുടങ്ങിയിട്ട്. ഭര്‍ത്താവ് മുഹമ്മദ് ഫിറോസിനെ (35) തേടിയുള്ള അലച്ചില്‍. വേദനയില്‍ പുളയുന്ന ശബ്ദമാണ് ഫിറോസിന്റേതായി അവളവസാനം കേട്ടത്. സംഘ് ഭീകരരുടെ കയ്യില്‍ പെട്ടിരുന്നു അയാള്‍. ജോലി കഴിഞ്ഞ് ലോനിയിലെ വീട്ടിലേക്ക് മടങ്ങുന്നതിനിടെയാണ് ഫിറോസിനെ ഇവര്‍ തല്ലിച്ചതച്ചത്.

' അക്രമത്തിനിടെ അദ്ദേഹത്തിന്റെ ഫോണ്‍ തകര്‍ന്നിരുന്നു. അദ്ദേഹത്തെ സമീപത്തെ ഒരു മുസ്‌ലിം കുടുംബം രക്ഷിച്ചു. അവരദ്ദേഹത്തിന് അഭയം നല്‍കി. അവരുടെ ഫോണില്‍ നിന്ന് അദ്ദേഹം സഹോദരിയുടെ മകനെ വിളിച്ചിരുന്നു. ഫെബ്രുവരി 24നായിരുന്നു അത്. പിന്നീട് അദ്ദേഹത്തെ കുറിച്ച് ഒരു വിവരവും ലഭിച്ചിട്ടില്ല'- ഷബാന വിതുമ്പി.

'അവസാനമായി തന്നെ വിളിക്കുമ്പോള്‍ സംസാരിക്കാന്‍ പോലും പറ്റാത്ത അവസ്ഥയിലായിരുന്നു ഫിറോസെന്ന് ഷബാന ഓര്‍ക്കുന്നു. കരണ്ടില്ലാത്തതിനാല്‍ എന്റെ ഫോണിലും ചാര്‍ജ്ജുണ്ടായിരുന്നില്ല. ഇതൊരു പക്ഷേ ഞങ്ങള്‍ തമ്മിലുള്ള അവസാന സംഭാഷണമായിരിക്കുമെന്ന് അദ്ദേഹം പറഞ്ഞിരുന്നു. അദ്ദേഹത്തിന് അഭയം വീട് അക്രമികള്‍ തീയിട്ടതായി പിന്നീടറിഞ്ഞു. അദ്ദേഹം എവിടെയാണെന്ന് ആര്‍ക്കറിയാം- കണ്ണീര്‍ നോവായി ഷബാന.

ഒരുപക്ഷേ ഫിറോസ് ജീവിച്ചിരിപ്പുണ്ടാവാം- ഒട്ടും പ്രതീക്ഷയില്ലാതെ അവര്‍ കൂട്ടിച്ചേര്‍ത്തു.

ആസൂത്രിതമായി നടത്തിയ വംശഹത്യയില്‍ 43 പേര്‍ കൊല്ലപ്പെട്ടെന്നാണ് കണക്കുകള്‍ പറയുന്നത്.
ഗുരുതര പരിക്കേറ്റ് നിരവധി പേരെയാണ് ആശുപത്രിയില്‍ പ്രവേശിപ്പിച്ചിരിക്കുന്നത്. ഇനിയും നിരവധിയാളുകളെ കണ്ടെത്താനുണ്ട്. പ്രദേശങ്ങളില്‍ നിന്ന് മുസ്‌ലിം കുടുംബങ്ങള്‍ കൂട്ടത്തോടെ ഒഴിഞ്ഞു പോവുകയാണ്.