മാള: നാലര പതിറ്റാണ്ട് മുന്‍പ് നിര്‍മിച്ച പൊയ്യ എലിച്ചിറ പാലത്തിനോടുള്ള അധികൃതരുടെ അവഗണന തുടരുന്നു. ഏതാനും വര്‍ഷങ്ങളായി പാലം അപകട ഭീഷണിയിലാണ്. ദ്രവിച്ചും അടര്‍ന്നും പാലത്തിന്റെ പലഭാഗങ്ങളും അടര്‍ന്ന് പോയിട്ടുണ്ട്.
പാലത്തിന്റെ അവസ്ഥ ആതീവ ഗുരുതരമായിട്ട് വര്‍ഷങ്ങളേറെയായിട്ടും അധികൃതര്‍ പരിഗണിക്കുന്നില്ലെന്ന് നാട്ടുകാര്‍ പരാതിപ്പെടുന്നു. പാലത്തിലൂടെ കടന്നു പോകുന്ന വാഹനങ്ങള്‍ക്ക് അപകടം വഴിമാറിപോകുന്നത് തലനാരിഴക്കാണ്. സ്‌കൂള്‍ ബസ്, റൂട്ട് ബസ് എന്നിവ അടക്കം നൂറുകണക്കിന് വാഹനങ്ങളാണ് നിത്യേന പാലത്തിലൂടെ കടന്നുപോകുന്നത്.
ഭാരവാഹനങ്ങള്‍ കയറിയിറങ്ങുമ്പോള്‍ പാലത്തിന് ശക്തമായ കുലുക്കം അനുഭവപ്പെടുന്നതായി പ്രദേശവാസികള്‍ പറയുന്നു. 1971 ലാണ് പൊയ്യ മണലിക്കാട് പ്രദേശങ്ങളെ തമ്മില്‍ ബന്ധിപ്പിക്കാനായി എലിച്ചിറ പാലം നിര്‍മിച്ചത്. പാലത്തിന്റെ വരവോടെ പൊയ്യയില്‍ നിന്ന് കണക്കന്‍കടവ്, പുത്തന്‍വേലിക്കര തുടങ്ങിയവിടങ്ങളിലേക്കുള്ള എളുപ്പമാര്‍ഗം തെളിഞ്ഞു. പിന്നീട് കാലപ്പഴക്കത്തില്‍ പാലത്തിന് തകരാറുകള്‍ സംഭവിക്കുകയും ചെയ്തു.
അടിഭാഗത്തെ കോണ്‍ക്രീറ്റ് അടര്‍ന്ന് കമ്പികളെല്ലാം പുറത്തുവന്ന നിലയിലാണ്. കൈവരികള്‍ ദ്രവിച്ചിച്ചുമുണ്ട്. തൂണുകളുടെ അവസ്ഥയും വ്യത്യസ്ഥമല്ല. വീതി കുറഞ്ഞ പാലത്തിലൂടെ ഒരു സമയം ഒരു വലിയ വാഹനത്തിന് മാത്രമേ കടന്നു പോകാന്‍ സാധിക്കുകയുള്ളു. ഇത് മൂലം ചില സമയങ്ങളില്‍ ഗതാഗതകുരുക്കും അനുഭവപ്പെടാറുണ്ട്. പാലത്തിന്റെ കൈവരികള്‍ പൂര്‍ണമായും തകര്‍ന്നതിനാല്‍ ഭയപ്പാടോടെയാണ് പാലത്തിലൂടെയുള്ള യാത്ര.
തകരാറിലായ പാലത്തിന് പകരം പുതിയ പാലം ആവശ്യമാണെന്നും ഇതിനായി എത്രയും വേഗത്തില്‍ അധികൃതര്‍ നടപടി സ്വീകരിക്കണമെന്നുമാണ് നാട്ടുകാരുടെ ആവശ്യം. ഇല്ലെങ്കില്‍ വലിയൊരു ദുരന്തത്തിന് പാലം കാരണമായേക്കാമെന്നാണ് നാട്ടുകാരുടെ ആശങ്ക.