കുന്നംകുളം: രണ്ടര കിലോ കഞ്ചാവുമായി മധ്യവയസ്‌കന്‍ കുന്നംകുളം പൊലിസ് പിടിയിലായി. പാലക്കാട് ആനക്കട്ടി ഷോളയൂര്‍ സ്വദേശി വട്ടലാക്കില്‍ ലക്ഷം വീട് കോളനിയില്‍ ചിന്ന (52) നെയാണ് കുന്നംകുളം സി.ഐ കെ.ജി സുരേഷ്‌കുമാറിന്റെ നേതൃത്വത്തിലുള്ള പൊലിസ് സംഘം അറസ്റ്റു ചെയ്തത്.
തമിഴ്‌നാട്ടില്‍ നിന്നും കുന്നംകുളത്തെ വ്യാപാരികള്‍ക്കു കഞ്ചാവ് വിതരണം ചെയ്യുന്ന സംഘത്തിലെ പ്രധാനിയാണ് ചിന്നന്‍. ഉത്സവ മേഖലകളിലേക്കു കഞ്ചാവ് എത്തിക്കുന്നതാണ് പ്രതിയുടെ ശൈലി. 2016 ല്‍ രണ്ടു കിലോ കഞ്ചാവുമായി കുന്നംകുളം പൊലിസും 2013 ല്‍ ചാവക്കാട് നിന്ന് രണ്ടു കിലോ കഞ്ചാവുമായി എക്‌സൈസ് സംഘവും ഇയാളെ പിടികൂടിയിട്ടുണ്ട്. ഇതിന്റെ വിചാരണ നടന്നുവരികയാണ്. കഴിഞ്ഞ ദിവസം രാത്രി കുന്നംകുളത്തേക്ക് പ്രതി കഞ്ചാവുമായി വരുന്നുണ്ടെന്നു രഹസ്യ വിവരത്തെ തുടര്‍ന്ന്് ജില്ലാ പൊലിസ് മേധാവിയുടെ നിര്‍ദേശ പ്രകാരമായിരുന്നു പൊലിസ് അതീവ രഹസ്യമായി പ്രതിയെ വലയിലാക്കിയത്.
എസ്.പിയുടെ സബ് ഡിവിഷണല്‍ സ്‌ക്വാഡാണ് പ്രതിയെ പിടികൂടിയത്. എസ്.ഐ യു.കെ ഷാജഹാന്‍ പൊലിസുകാരായ രാഗേഷ്, നിഗേഷ്, അഷറഫ്, ബാബുരാജ് എന്നിവരും അന്വേഷണ സംഘത്തിലുണ്ടായിരുന്നു.