ഗോവിന്ദാപുരം: മോഷണ വാഹനങ്ങള്‍ അതിര്‍ത്തി കടന്നെത്തുന്നത് വര്‍ധിക്കുന്നു. തമിഴ്‌നാട്ടില്‍നിന്നും കേരളത്തില്‍നിന്നുമുള്ള മോഷണ വാഹനങ്ങള്‍ അതിര്‍ത്തികള്‍ കടക്കുന്നത് പതിവായിരിക്കുകയാണ്. കേരള പൊലിസും തമിഴ്‌നാട് പൊലിസും ഗോവിന്ദപുരത്ത് സി.സി.ടി.വി കാമറകള്‍ സ്ഥാപിച്ചിട്ടുണ്ടെങ്കിലും മറ്റ് നടപടികളൊന്നുമില്ല.
മോഷ്ടിക്കപ്പെടുന്ന വാഹനങ്ങളുടെ പരാതി ലഭിക്കുമ്പോള്‍ ദ്യശ്യങ്ങള്‍ സൂക്ഷിച്ചിട്ടില്ല എന്ന മറുപടിയാണ് ഉദ്യോഗസ്ഥരുടെ ഭാഗത്തുനിന്നും ഉണ്ടാവുന്നതെന്നും ആരോപണമുണ്ട്. പുതുനഗരം, ചിറ്റൂര്‍, കൊല്ലങ്കോട് മേഖലകളില്‍ വാഹനമോഷണങ്ങള്‍ വര്‍ധിച്ചതിനാല്‍ സി.സി.ടിവി പരിശോധന ശക്തമാക്കണമെന്നും ആറ് മാസത്തെ കാലയളവിലുള്ള സി.സി.ടി.വി ദൃശ്യങ്ങള്‍ സംരക്ഷിക്കണമെന്നാണ് നാട്ടുകാരുടെ ആവശ്യം.