കാഞ്ഞങ്ങാട്: നാടിന്റെ സാമൂഹ്യ ജീവിതത്തില്‍ വേറിട്ട ജീവിതം നയിക്കുന്ന മത്സ്യത്തൊഴിലാളികള്‍ക്ക് കടല്‍ അന്യമായികൊണ്ടിരിക്കുകയാണെന്ന് സി.പി.ഐ ദേശീയ കമ്മിറ്റി അംഗം പന്ന്യന്‍ രവീന്ദ്രന്‍ പറഞ്ഞു. മത്സ്യത്തൊഴിലാളി ഫെഡറേഷന്‍( എ.ഐ.ടി.യു.സി) നടത്തുന്ന വടക്കന്‍ മേഖല ജാഥ കാഞ്ഞങ്ങാട് പുഞ്ചാവിയില്‍ വെച്ച് ഉദ്ഘാടനം ചെയ്യുകയായിരുന്നു അദ്ദേഹം. ഫെബ്രവരി ആറിന് മത്സ്യത്തൊഴിലാളി ഫെഡറേഷന്‍ നയിക്കുന്ന രാജ്ഭവന്‍ മാര്‍ച്ചിന്റെ ഭാഗമായാണ് ജാഥ സംഘടിപ്പിക്കുന്നത്.
തീരസംരക്ഷണ നിയമത്തില്‍ നിന്നും ടൂറിസത്തിനും കോര്‍പ്പറേറ്റുകള്‍ക്കും കൊടുത്തിട്ടുള്ള ഇളവുകള്‍ റദ്ദ് ചെയ്യുക. ദേശീയ കപ്പല്‍പാത സംഘടനകളുമായി ചര്‍ച്ച ചെയ്ത് സമവായം ഉണ്ടാക്കി നടപ്പിലാക്കുക. പെന്‍ഷന്‍ ഉള്‍പ്പെടെയുള്ള ക്ഷേമ പദ്ധതികള്‍ കാലോചിതമായി പരിഷ്‌ക്കരിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് ജാഥ സംഘടിപ്പിക്കുന്നത്. കാഞ്ഞങ്ങാട് നിന്നാരംഭിച്ച ജാഥ എറണാകുളത്ത് സമാപിക്കും. എ.ഐ. ടി. യു സി ജില്ലാ ജനറല്‍ സെക്രട്ടറി കെ.വി കൃഷ്ണന്‍ അധ്യക്ഷനായി. ജാഥ ഡെപ്യൂട്ടി ലീഡര്‍ കെ.ജി ശിവാനന്ദന്‍, ഡയറക്ടര്‍ എ.കെ ജബ്ബാര്‍, ടി. രഘുവരന്‍, ഗോവിന്ദന്‍ പള്ളിക്കാപ്പില്‍, എലിസബത്ത് അസീസ്, താവം ബാലന്‍, സി.പി മുരളി , ടി. കൃഷ്ണന്‍, സി.പി ബാബു, എ. അമ്പൂഞ്ഞി, സുരേഷ് പുഞ്ചാവി സംസാരിച്ചു.