ന്യൂഡല്‍ഹി: രാജ്യദ്രോഹക്കേസില്‍ സി.പി.ഐ നേതാവും ജെ.എന്‍.യു വിദ്യാര്‍ഥി യൂനിയന്‍ മുന്‍ നേതാവുമായ കനയ്യ കുമാറിനെ വിചാരണ ചെയ്യാന്‍ ഡല്‍ഹി സര്‍ക്കാര്‍ അനുമതി നല്‍കിയതിനെതിരേ ശക്തമായ പ്രതിഷേധം. മൂന്നു വര്‍ഷമായി ഡല്‍ഹി സര്‍ക്കാരിന്റെ വിചാരണാനുമതി ലഭിക്കാതിരുന്നതിനാല്‍ ഡല്‍ഹി പൊലിസ് സമര്‍പ്പിച്ച 1,200 പേജുള്ള കുറ്റപത്രം ഹൈക്കോടതി മടക്കിയിരുന്നു. കഴിഞ്ഞദിവസമാണ് സര്‍ക്കാര്‍ കനയ്യയെ പ്രോസിക്യൂട്ട് ചെയ്യാന്‍ അനുമതി നല്‍കിയത്. 

ബിഹാര്‍ തെരഞ്ഞെടുപ്പ് മുന്നില്‍ക്കണ്ടാണ് ഡല്‍ഹി സര്‍ക്കാരിന്റെ നടപടിയെന്നാണ് ആക്ഷേപം. രാജ്യദ്രോഹക്കേസിന് അംഗീകാരം നല്‍കിയ ഡല്‍ഹി സര്‍ക്കാരിന് നന്ദിയുണ്ട്. ഇത്തരം കേസില്‍ ഫാസ്റ്റ് ട്രാക്ക് കോടതിയും വേഗത്തിലുള്ള തീരുമാനവുമാണ് വേണ്ടതെന്നായിരുന്നു കനയ്യയുടെ പ്രതിരണം. അതിനാല്‍ ഈ നിയമം രാഷ്ടീയ ലക്ഷ്യത്തിനായി എങ്ങനെ ദുരുപയോഗം ചെയ്യപ്പെട്ടുവെന്നു വ്യക്തമാകുമെന്നും കനയ്യ പ്രതികരിച്ചു.

രാഷ്ട്രീയ ലാഭമാണ് ആംആദ്മി സര്‍ക്കാരിന്റെ അജന്‍ഡ. രാജ്യദ്രോഹ നിയമത്തെക്കുറിച്ച് ഡല്‍ഹി സര്‍ക്കാര്‍ അജ്ഞരാണെന്നു കോണ്‍ഗ്രസ് നേതാവ് പി. ചിദംബരം പറഞ്ഞു. കേന്ദ്ര സര്‍ക്കാരിന്റെയും കെജ്‌രിവാള്‍ സര്‍ക്കാരിന്റെയും പ്രവര്‍ത്തനങ്ങളില്‍ സാമ്യത കണ്ടുതുടങ്ങിയെന്നായിരുന്നു കോണ്‍ഗ്രസിന്റെ പ്രതികരണം. എത്ര രൂപയ്ക്കാണ് താങ്കളെ വില്‍ക്കാന്‍ വച്ചിരിക്കുന്നതെന്നാണ് കെജ്‌രിവാളിനെ പരിഹസിച്ച് ബോളിവുഡ് നടനും സംവിധായകനുമായ അനുരാഗ് കശ്യപ് ട്വീറ്റ് ചെയ്തത്. 

2016ല്‍ അഫ്‌സല്‍ ഗുരുവിനെ തൂക്കിലേറ്റിയ ദിവസം ജെ.എന്‍.യു കാംപസില്‍ നടത്തിയ അനുസ്മരണ പരിപാടിയില്‍ രാജ്യവിരുദ്ധ മുദ്രാവാക്യങ്ങളുയര്‍ത്തിയെന്ന ആരോപണത്തിലാണ് കനയ്യ കുമാര്‍ ഉള്‍പ്പെടെ ഒന്‍പത് പേര്‍ക്കെതിരേ കേസെടുത്തത്.