ന്യൂഡല്‍ഹി: തലസ്ഥാനത്ത് നടന്ന വംശീയാതിക്രമണത്തില്‍ ഡല്‍ഹി പൊലിസ് ആരോപണങ്ങള്‍ നേരിടവേ, ഡല്‍ഹി പൊലിസിന്റെ നിലപാടിനെ പരസ്യമായി തള്ളി ഡല്‍ഹി മുന്‍ പൊലിസ് കമ്മിഷണര്‍ രംഗത്ത്. ബി.എസ്.എഫ് മുന്‍ ഡയരക്ടര്‍ ജനറലും മുന്‍ ഡല്‍ഹി പൊലിസ് കമ്മിഷണറുമായ അജയ് രാജ് ശര്‍മയാണ് ഒരു അഭിമുഖത്തിനിടെ ഇക്കാര്യം പറഞ്ഞത്.

താനാണ് ഇപ്പോള്‍ ഡല്‍ഹിയിലെ പൊലിസ് കമ്മിഷണറെങ്കില്‍ ബി.ജെ.പി നേതാക്കളായ അനിരാഗ് താക്കൂര്‍, പര്‍വേഷ് വര്‍മ, കപില്‍ മിശ്ര എന്നിവരെ ഉടന്‍തന്നെ അറസ്റ്റ് ചെയ്യുമായിരുന്നെന്ന് അദ്ദേഹം പറഞ്ഞു.

ആക്രമണങ്ങള്‍ക്കിടെ പുറത്തുവന്ന വിഡിയോകളില്‍നിന്ന് ഡല്‍ഹി പൊലിസ് വര്‍ഗീയപരമായി പെരുമാറിയെന്നതു വ്യക്തമാണെന്നും അദ്ദേഹം പറഞ്ഞു. ആക്രമണം തുടങ്ങുന്ന സമയത്ത് പൊലിസ് കമ്മിഷണറുടെ ചുമതലയുണ്ടായിരുന്ന അമൂല്യ പട്‌നായിക് കടുത്ത പരീക്ഷയാണ് നേരിട്ടതെന്നും എന്നാല്‍ അതില്‍ അദ്ദേഹം പരാജയപ്പെട്ടെന്നും അജയ് രാജ് ശര്‍മ പറഞ്ഞു.

പൊലിസില്‍ പ്രൊഫഷണലിസം ഇല്ലാതായതാണ് ഇതിനു കാരണമെന്ന ആരോപണങ്ങളും അദ്ദേഹം ശരിവച്ചു. എന്നാല്‍, ഷഹീന്‍ബാഗിലെ സമരത്തിന് അനുമതി നല്‍കിയതും അത് അനവിടെ തുടരുന്നതുമാണ് പൊലിസില്‍നിന്നുണ്ടായ ആദ്യ തെറ്റെന്നും അദ്ദേഹം പറഞ്ഞിട്ടുണ്ട്.

കപില്‍ മിശ്രയടക്കമുള്ളി ബി.ജെ.പി നേതാക്കളുടെ വിദ്വേഷ, പ്രകോപന പ്രസ്താവനകളാണ് വംശഹത്യയിലേക്കു നയിച്ചതെന്നു വ്യക്തമാണ്. ഇവര്‍ക്കെതിരേ കേസെടുക്കാന്‍ ഡല്‍ഹി ഹൈക്കോടതി ഉത്തരവിട്ടിരുന്നു. എന്നാല്‍, അന്നുതന്നെ ആ ഉത്തരവ് പുറപ്പെടുവിച്ച ജഡ്ജിയെ സ്ഥലംമാറ്റുകയും പിറ്റേന്നു കേസ് പരിഗണിച്ച മറ്റൊരു ബെഞ്ച് കേസെടുക്കാന്‍ സമയം നീട്ടിനല്‍കുകയുമായിരുന്നു.

അതേസമയം, ഡല്‍ഹി പൊലിസ് കമ്മിഷണറായിരുന്ന അമൂല്യ പട്‌നായിക് ഇന്നലെ സര്‍വിസില്‍നിന്നു വിരമിച്ചു. ഇദ്ദേഹത്തിനു പകരക്കാരനായി എസ്.എന്‍ ശ്രീവാസ്തവയെ കഴിഞ്ഞ ദിവസംതന്നെ ആഭ്യന്തര മന്ത്രാലയം നിയമിച്ചിരുന്നു.