തിരുവനന്തപുരം: മുന്‍ ഡി.സി.പി ചൈത്ര തെരേസാ ജോണ്‍ പാര്‍ട്ടി ജില്ലാ കമ്മിറ്റി ഓഫിസ് റെയ്ഡ് ചെയ്തത് മാധ്യമശ്രദ്ധ നേടുന്നതിനാണെന്ന് സി.പി.എം തിരുവനന്തപുരം ജില്ലാ സെക്രട്ടറി ആനാവൂര്‍ നാഗപ്പന്‍. ചൈത്രയ്ക്ക് ഗൂഢലക്ഷ്യമാണുള്ളത്. അര്‍ധരാത്രി പരിശോധന നടത്തിയതില്‍ ദുരൂഹതയുണ്ടെന്നും അന്വേഷണം വേണമെന്നും ആനാവൂര്‍ വാര്‍ത്താസമ്മേളനത്തില്‍ ആവശ്യപ്പെട്ടു.

അനുമതിയില്ലാതെയാണ് നിയമസഭ ചേരുന്നതിനു തൊട്ടുമുന്‍പ് റെയ്ഡ് നടത്തിയത്. ശബരിമല പ്രക്ഷോഭകാലത്ത് ബി.ജെ.പി ഓഫിസില്‍പോലും പൊലിസ് കയറിയിട്ടില്ല. സി.പി.എമ്മിനെ ജനമധ്യത്തില്‍ അപഹസിക്കാനും മാധ്യമശ്രദ്ധ നേടി താരപരിവേഷം ഉണ്ടാക്കാനും ഉള്ള ശ്രമത്തിന്റെ ഭാഗമായിട്ടായിരുന്നു അര്‍ധരാത്രിയിലെ പരിശോധനാ നാടകം.

നാലാം നിലവരെ കയറിയ ഉദ്യോഗസ്ഥ റെയിഡെന്ന പേരില്‍ രണ്ട് കക്കൂസുകള്‍ മാത്രമാണ് തുറന്ന് പരിശോധിച്ചത്. അടച്ചിട്ട മുറികളൊന്നും തുറന്ന് പരിശോധിച്ചിട്ടില്ല. പ്രതിയെ ഒളിപ്പിച്ചിട്ടുണ്ട് എന്ന് വിവരം ലഭിച്ച സ്ഥിതിക്ക് മുഴുവന്‍ മുറികളും തുറന്ന് പരിശോധിക്കേണ്ടതാണ്. എന്നാല്‍ അതിന് തയാറാകാതെ അവര്‍ മടങ്ങുകയായിരുന്നു.

പരിശോധനയ്ക്ക് എത്തിയ ഡി.സി.പിയെ സി.പി.എം ജില്ലാ സെക്രട്ടറിയുടെ നേതൃത്വത്തില്‍ തടഞ്ഞുവെന്നാണ് ചില മാധ്യമങ്ങള്‍ പ്രചരിപ്പിക്കുന്നത്. ഇത് പച്ചക്കള്ളമാണ്. ചികിത്സയിലായിരുന്നതിനാല്‍ ജില്ലാ സെക്രട്ടറി സ്ഥലത്തുണ്ടായിരുന്നില്ല. പരിശോധനാ സമയം രണ്ട് ഓഫിസ് ജീവനക്കാര്‍ മാത്രമായിരുന്നു ഉണ്ടായിരുന്നതെന്നും ഓഫിസിലെ സി.സി.ടി.വി ദൃശ്യങ്ങള്‍ പുറത്ത് വിട്ട് ആനാവൂര്‍ നാഗപ്പന്‍ പറഞ്ഞു.
വാര്‍ത്താസമ്മേളനത്തില്‍ സംസ്ഥാന കമ്മിറ്റിഅംഗം വി. ശിവന്‍കുട്ടി, ജില്ലാ സെക്രട്ടേറിയറ്റ് അംഗം കെ.സി വിക്രമന്‍ എന്നിവരും പങ്കെടുത്തു.
അതേസമയം, അനുമതിയില്ലാതെയാണ് റെയ്‌ഡെന്ന സി.പി.എമ്മിന്റെ ആരോപണം പൊലിസ് തള്ളി. കോടതിയെ അറിയിച്ചതിനുശേഷമാണ് റെയ്ഡിനെത്തിയതെന്നും സ്‌റ്റേഷന്‍ രജിസ്റ്ററില്‍ ജി.ഡി എന്‍ട്രി രേഖപ്പെടുത്തിയതായും പൊലിസ് അറിയിച്ചു.