റിയാദ് : നിയമക്കുരുക്കിലകപ്പെട്ട് എട്ടു മാസത്തോളമായി ജോലിയും ശമ്പളവും ഇല്ലാതെ ദുരിതത്തിലായ 250ൽ പരം തൊഴിലാളികൾക്ക് കേളി കലാസാംസ്കാരിക വേദി ലുലു ഹൈപ്പർ മാർക്കറ്റിന്റെ സഹായത്തോടെ ഭക്ഷണവും പലവ്യഞ്ജനങ്ങളും വിതരണം ചെയ്തു.

ന്യൂ സനയ്യയിലെ ഒരു കമ്പനിയാണ് നിയമക്കുരുക്കിൽപ്പെട്ട് തൊഴിലാളികളുടെ ഇഖാമ പുതുക്കാൻ സാധിക്കാതെയും ശമ്പളം നൽകാൻ കഴിയാതെയും പ്രവർത്തനം നിർത്തിവെച്ചത്. ആയിരത്തിൽ പരം തൊഴിലാളിൽ ഉണ്ടായിരുന്ന കമ്പനിയിൽ നിന്നും ഇഖാമ കാലാവധി ഉണ്ടായിരുന്ന 700ൽ പരം തൊഴിലാളികളെ നാട്ടിലേക്ക് തിരിച്ചയച്ചു. എന്നാൽ ഇഖാമ കാലാവധി അവസാനിച്ച 250ൽ പരം തൊഴിലാളികൾക്ക് സ്വദേശത്തേക്ക് മടങ്ങാൻ കഴിയാതെ ഏറെ പ്രയാസപ്പെട്ട് ജീവിതം തള്ളി നീക്കുകയാണ്‌.  ഈ തൊഴിലാളികൾ എംബസി മുഖേന ലേബർ കോടതിയെ സമീപിച്ച് കോടതിയുടെ അന്തിമ വിധിക്കായി എട്ടു മാസത്തോളമായി കാത്തിരിപ്പാണ്‌.

ജോലിയോ വരുമാനമോ ഇല്ലാതെ നിത്യ ചെലവിന്‌ പോലും ഏറെ ബുദ്ധിമുട്ടുന്ന തൊഴിലാളികളെ കുറിച്ചുള്ള വിവരം
കേളി പ്രവർത്തകർ പൊതുസമൂഹത്തിന്റെ 
ശ്രദ്ധയിൽ കൊണ്ടു വരികയും ന്യൂസനയ്യയിലെ വ്യാപാര സ്ഥാപനങ്ങളുമായി സഹകരിച്ച് കഴിഞ്ഞ ജനുവരിയിൽ ഭക്ഷ്യ വസ്തുക്കൾ എത്തിച്ചു കൊടുക്കുകയും ചെയ്തിരുന്നു.  കേസ് അനന്തമായി നീളുന്ന സാഹചര്യത്തിൽ കേളിയുടെ അഭ്യർത്ഥന മാനിച്ച് ഫുഡ് ഫെസ്റ്റിന്റെ ഭാഗമായി ഒരു നേരത്തെ ഭക്ഷണവും തുടർന്നുള്ള ദിവസങ്ങളിലേക്ക് ഭക്ഷണം പാചകം ചെയ്യുന്നതിനാവശ്യമായ സാധനങ്ങളും വിതരണം ചെയ്യാൻ ലുലു ഹൈപ്പർ മാർക്കറ്റ് അധികൃതർ തയ്യാറാവുകയായിരുന്നു.

കേളി ന്യൂ സനയ്യ ആക്ടിങ് സെക്രട്ടറി നിസാർ മണ്ണഞ്ചേരി ഏരിയ കമ്മിറ്റി അംഗങ്ങളായ ഹുസൈൻ മണക്കാട്, ജോർജ്ജ് വർഗ്ഗീസ്, കരുണാകരൻ കണ്ടോന്താർ, ഷാജി, അബ്ദൾ നാസർ, കരുണാകരൻ മണ്ണടി എന്നിവർ ഭക്ഷണവും പലവ്യഞ്ജനങ്ങളും വിതരണം ചെയ്യുന്നതിന് നേതൃത്വം നൽകി.