മുംബൈ: മഹാരാഷ്ട്രയില്‍ വിദ്യാഭ്യാസ രംഗത്ത് മുസ്ലിങ്ങള്‍ക്ക് അഞ്ച് ശതമാനം സംവരണം ഏര്‍പ്പെടുത്താനുള്ള തീരുമാനം പരിഗണനയില്‍ പോലുമില്ലെന്ന് ശിവസേന.

മുസ്‌ലിങ്ങള്‍ക്കു സംവരണം നല്‍കുന്നനെതിരെ വിശ്വഹിന്ദു പരിഷദ്(വി.എച്ച്.പി) രംഗത്തെത്തിയതിനു പിന്നാലെയാണ് നിക്കത്തെ ശിവസേനയുടെ വിശദീകരണം.

'' മതാടിസ്ഥാനത്തില്‍ മുസ്ലിമുകള്‍ക്ക് സംവരണം നല്‍കുമെന്ന തരത്തിലുള്ള വാര്‍ത്തകള്‍ അസ്വസ്ഥത ഉണ്ടാക്കുന്നതാണ്. മുസ്ലിങ്ങളെ പ്രീതിപ്പെടുത്തുന്ന തരത്തിലുള്ള തീരുമാനം ശിവസേന നയിക്കുന്ന സര്‍ക്കാറില്‍ നിന്ന് ഉണ്ടാകരുത്. ഇത് ഹിന്ദു സമൂഹത്തിന്റെ പ്രതീക്ഷയാണ്'' എന്ന് വിശ്വഹിന്ദു പരിഷദ് ശനിയാഴ്ച ട്വീറ്റ് ചെയ്തിരുന്നു.

ഇതിനു മറുപടിയായാണ് അത്തരത്തിലൊരു വിഷയവും ചര്‍ച്ചയില്‍ പോലുമില്ലെന്ന് ശിവസേനയുടെ കമ്മ്യൂണിക്കേഷന്‍ സെല്‍ മറുപടി നല്‍കുകയായിരുന്നു.

വിദ്യാഭ്യാസ മേഖലയില്‍ മുസ്‌ലിങ്ങള്‍ക്ക് അഞ്ച് ശതമാനം സംവരണം ഏര്‍പ്പെടുത്തുമെന്ന് മഹാരാഷ്ട്ര ന്യൂനപക്ഷകാര്യ മന്ത്രി നവാബ് മാലിക്ക് പറഞ്ഞിരുന്നു.

മുസ്ലിങ്ങള്‍ക്കു വിദ്യാഭ്യാസ സ്ഥാപനങ്ങളില്‍ 2014ല്‍ അഞ്ചു ശതമാനം സംവരണം ഏര്‍പ്പെടുത്തിയത് ബോംബെ ഹൈക്കോടതി ശരിവച്ചിരുന്നു. എന്നാല്‍ കോടതി ഉത്തരവുണ്ടായിട്ടു പോലും കഴിഞ്ഞ ശിവസേന- ബി.ജെ.പി സര്‍ക്കാര്‍ ഇത് നടപ്പാക്കിയിരുന്നില്ല. എന്നാല്‍ ഈ സര്‍ക്കാര്‍ അഞ്ചു ശതമാനം സംവരണം ഏര്‍പ്പെടുത്താന്‍ ഉടന്‍ നിയമം കൊണ്ടുവരുമെന്നായിരുന്നു നവാബ് മാലിക് പറഞ്ഞത്.