ന്യൂഡല്‍ഹി: വോട്ടവകാശം വിനിയോഗിക്കണമെന്നും സ്വന്തം അവകാശങ്ങളും അധികാരങ്ങളും വിനിയോഗിക്കാത്തതില്‍ പിന്നീട് ദുഃഖിക്കേണ്ട സാഹചര്യമുണ്ടാകരുതെന്നും യുവാക്കളോട് പ്രധാനമന്ത്രി നരേന്ദ്രമോദിയുടെ അഭ്യര്‍ഥന. മാന്‍ കി ബാത്ത് പരിപാടിയിലാണ് പ്രധാനമന്ത്രി യുവാക്കളെ ഇക്കാര്യം ഉണര്‍ത്തിയത്.വരുന്ന ലോക്‌സഭാ തെരഞ്ഞെടുപ്പില്‍ സമ്മതിദാനാവകാശം വിനിയോഗിക്കണമെന്ന് ഉണര്‍ത്തിയ അദ്ദേഹം, രാജ്യത്തോട് എല്ലാവര്‍ക്കും ബാധ്യതയുണ്ടെന്നും പറഞ്ഞു. അവസരങ്ങള്‍ക്കൊപ്പം രാജ്യത്തോടുള്ള ഉത്തരവാദിത്തങ്ങളും ശ്രദ്ധിക്കാനാകണം. രാജ്യത്തിന്റെ വികസനത്തിന് യുവാക്കളുടെ പങ്ക് വലുതാണ്. വ്യക്തിപരമായ താല്‍പര്യങ്ങള്‍ക്കൊപ്പം രാജ്യതാല്‍പര്യങ്ങളും സംരക്ഷിക്കണമെന്നും അദ്ദേഹം പറഞ്ഞു.