മുന്നാട്(കാസര്‍കോട്):സര്‍വ സീമകളും ലംഘിച്ച് കോളജ് മാഗസിന്‍ പുറത്തിറക്കിയതോടെ പ്രതിരോധത്തിലായി കോളേജധികൃതര്‍. കയ്യില്‍ വാങ്ങിക്കാന്‍ പോലും അറച്ചുനില്‍ക്കുകയാണ് വിദ്യാര്‍ഥികള്‍. അശ്ലീല വാക്കുകളുമായും അനുചിതമായ ചിത്രങ്ങളോടെയും പുറത്തിറക്കിയ മുന്നാട് കോളജിലെ ഉറ മറച്ചത് എന്ന മാഗസിനാണ് ഏറെ വിവാദം സൃഷ്ടിച്ചത്.
കാസര്‍ക്കോട്ടെ ബേഡഡുക്ക പഞ്ചായത്തിലെ മുന്നാട് പീപ്പിള്‍സ് ആര്‍ട്‌സ് ആന്‍ഡ് സയന്‍സ് കോളജില്‍ ഈ വര്‍ഷം പുറത്തിറക്കിയ മാഗസിനാണ് എല്ലാ സദാചാര സീമകളെയും കടത്തി വെട്ടിയതെന്നാണ് ആരോപണം.
മാഗസിന്റെ പുറംചട്ടയിലും അകത്തെ പേജിനുള്ളിലും സഭ്യതയുടെ എല്ലാ അതിര്‍ വരമ്പുകളും ലംഘിച്ചുകൊണ്ടുള്ള ചിത്രങ്ങളും പ്രയോഗങ്ങളുമാണ്. ഇതുമൂലം മാഗസിന്‍ തുറന്നു നോക്കാന്‍ പോലും പറ്റാത്ത അവസ്ഥയാണെന്നാണ് വിദ്യാര്‍ഥികള്‍ ഒന്നടങ്കം പറയുന്നത്. മാഗസിന്റെ കവറിലെ ചിത്രങ്ങളില്‍ തന്നെ അശ്ലീലത നിറച്ചിരിക്കുകയാണ്. മറയില്ലാത്ത ചില തുറന്നെഴുത്തുകള്‍ എന്ന് കവറില്‍ രേഖപ്പെടുത്തിയതും അശ്ലീലത വാക്കിലും വരയിലും പ്രദര്‍ശിപ്പിച്ചതിന്റെ മുന്‍കൂര്‍ ജാമ്യം കൂടിയാണെന്നും വിദ്യാര്‍ഥികള്‍ ആരോപിച്ചു.

2018-19 അധ്യയന വര്‍ഷത്തിലെ മാഗസിന്‍ കഴിഞ്ഞ മാസം അവസാനമാണ് പുറത്തിറക്കിയത്. മാഗസിന്‍ കൈയില്‍ കിട്ടിയ വിദ്യാര്‍ഥിനകളടക്കമുള്ളവര്‍ പുറം ചട്ടയിലുള്ള ചിത്രം കണ്ടതോടെ ഉള്‍പേജുകള്‍ മറിച്ചു നോക്കാന്‍ തന്നെ അറക്കുകയായിരുന്നു. എസ്.എഫ്.ഐക്കാണ് കോളജിലെ മാഗസിന്‍ എഡിറ്ററുടെ ചുമതല. ചീഫ് എഡിറ്റര്‍ കോളജ് പ്രിന്‍സിപ്പല്‍ സി.കെ ലുക്കോസും അനു സെബാസ്റ്റ്യന്‍ സ്റ്റാഫ് എഡിറ്ററുമാണ്. സ്റ്റുഡന്റ് എഡിറ്റര്‍ ആകാശ് പള്ളവുമാണ്.
ആര്‍ത്തവം, ലൈംഗികത, ലിംഗസമത്വം തുടങ്ങിയ വിഷയങ്ങളില്‍ ആഴത്തിലുള്ള അന്വേഷണമാണ് മാഗസിനെന്നാണ് എസ്.എഫ്.ഐ യൂണിയന്‍ നേതാക്കളുടെ വിശദീകരണം. കഴിഞ്ഞ വര്‍ഷം മാഗസിന്‍ പുറത്തിറക്കുന്നതിനെ കുറിച്ച് ആലോചിക്കുന്ന സമയത്ത് ലൈംഗികത, ആര്‍ത്തവം, ലിംഗസമത്വം എന്നീ വിഷയങ്ങള്‍ കേരളത്തില്‍ ചര്‍ച്ചയായിരുന്നുവെന്നാണ് മാഗസിന്‍ എഡിറ്റര്‍ വ്യക്തമാക്കുന്നത്. അതേ സമയം മാഗസിനെതിരെ വിദ്യാര്‍ഥിനികളും,വിദ്യാര്‍ഥികളും കെ.എസ്.യു ഉള്‍പ്പെടെയുള്ള സംഘടനകളും പ്രതിഷേധവുമായി രംഗത്തിറങ്ങിയിട്ടുണ്ട്.