തിരുവനന്തപുരം: സൗജന്യ കൈത്തറി സ്‌കൂള്‍ യൂണിഫോം നെയ്ത തൊഴിലാളികളുടെ കൂലി കുടിശിക ഉള്‍പ്പെടെ നല്‍കുന്നതിന് സര്‍ക്കാര്‍ 48 കോടി രൂപ അനുവദിച്ചു. കഴിഞ്ഞ വര്‍ഷം ജൂണ്‍ മുതല്‍ കുടിശികയായിരുന്ന കൂലിയും സ്പിന്നിങ്ങ് മില്ലുകളില്‍ നിന്നു വാങ്ങിയ നൂലിന്റെ വിലയും നല്‍കുന്നതിനാണ് ഈ തുക. രണ്ടു ദിവസത്തിനകം തുക വിതരണം ചെയ്യും.

വിദ്യാഭ്യാസ വകുപ്പിനാണ് തുക അനുവദിച്ചത്. വകുപ്പ് ഈ തുക വ്യവസായ വകുപ്പിനു കീഴിലുള്ള കൈത്തറി ഡയറക്ടറേറ്റിന് കൈമാറും. കൈത്തറി ഡയറക്ടറേറ്റ് ജില്ലാ വ്യവസായ കേന്ദ്രങ്ങള്‍ മുഖേന തുക കൈത്തറി സംഘങ്ങളുടെയും തൊഴിലാളികളുടെയും അക്കൗണ്ടിലേക്ക് നല്‍കും. കേരള സ്‌റ്റേറ്റ് ഫിനാന്‍ഷ്യല്‍ കോര്‍പ്പറേഷനില്‍നിന്നാണ് ആവശ്യമായ തുക ലഭ്യമാക്കുന്നത്.

കൈത്തറി നെയ്ത്തു മേഖലയുടെയും വിദ്യാഭ്യാസ മേഖലയുടെയും സംരക്ഷണത്തിന്റെ ഭാഗമായി സര്‍ക്കാര്‍ ആരംഭിച്ചതാണ് സൗജന്യ കൈത്തറി സ്‌കൂള്‍ യൂണിഫോം പദ്ധതി. പദ്ധതി പ്രകാരം നടപ്പ് അധ്യയന വര്‍ഷം 8.5 ലക്ഷം വിദ്യാര്‍ഥികള്‍ക്ക് 42 ലക്ഷം മീറ്റര്‍ തുണി വിതരണം ചെയ്തു.