സ്വന്തം ലേഖകന്‍

തിരുവനന്തപുരം:  ഏറെ വിവാദങ്ങളും നിയമപോരാട്ടങ്ങളും നടന്ന ലാവ്‌ലിന്‍ കേസ് വീണ്ടും നിയമസഭയില്‍. ഒപ്പം പാമൊയില്‍ കേസ് പമാര്‍ശിച്ച് ഭരണപക്ഷവും. പൊലിസിനും ഡി.ജി.പിക്കും എതിരായ സി.എ.ജി റിപ്പോര്‍ട്ടിലെ കണ്ടെത്തലുകളില്‍ അന്വേഷണം ആവശ്യപ്പെട്ട് പ്രതിപക്ഷം അടിയന്തരപ്രമേയത്തിന് നോട്ടീസ് നല്‍കിയതിനെ തുടര്‍ന്നാണ് ലാവ്‌ലിന് വീണ്ടും ചര്‍ച്ചയായത്.  

പ്രതിപക്ഷം ലാവ്‌ലിന്‍ വീണ്ടും കുത്തിപൊക്കിയത് മുഖ്യമന്ത്രി പിണറായി വിജയനെ ചൊടിപ്പിക്കുകയും ചെയ്തു. ഡി.ജി.പി ലോക്‌നാഥ് ബഹ്‌റയെ ന്യായീകരിച്ചുകൊണ്ടു മുഖ്യമന്ത്രി സംസാരിച്ചപ്പോഴാണ് അടിയന്തരപ്രമേയം നോട്ടീസ് അവതരിപ്പിച്ച പി.ടി തോമസ് ലാവ്‌ലിന്‍ കേസ് ചര്‍ച്ചയിലേക്ക് കൊണ്ടുവന്നത്. 

 

ഡി.ജി.പിയെ പുറത്താക്കാന്‍ മുഖ്യമന്ത്രി തയാറകണം. പിണറായി വിജയന് ഇരട്ടചങ്ക് അല്ലെന്നും ഡി.ജി.പി കാണുമ്പോള്‍ ചങ്കിടിപ്പാണെന്നും പ്രതിപക്ഷം ആരോപിച്ചു. ലാവ്‌ലിന്‍ കേസില്‍ ഡല്‍ഹി രാജധാനിയിലേക്ക് ബഹ്‌റ പാലത്തിലൂടെ മുഖ്യമന്ത്രി പിണറായി വിജയന്‍ സഞ്ചരിക്കുകയാണെന്ന് പി.ടി തോമസ് ആരോപിച്ചു.  ഇതോടെ പ്രതിപക്ഷനിരയില്‍ നിന്ന് എം.എല്‍.എ മാര്‍ ലാവ്‌ലിന്‍ എന്ന് ഉറക്കെ വിളിച്ചുപറഞ്ഞു. ലോക്‌നാഥ് ബഹ്‌റയെ സംരക്ഷിക്കുന്നതിന് പിന്നില്‍ ലാവ്‌ലിന്‍കേസാണെന്ന പ്രതിപക്ഷ പരമാര്‍ശം മുഖ്യമന്ത്രിയെ ക്ഷുഭിതനാക്കി. ഏത് ലാവ്‌ലിന്റെ കാര്യമാണ് നിങ്ങള്‍ പറയുന്നത് എന്ന് ചോദിച്ചുകൊണ്ട് തുടങ്ങിയ മുഖ്യമന്ത്രി കേസിന്റെ വിശദാംശങ്ങള്‍ വ്യക്തമാക്കി. തനിക്ക് ഒരു ശങ്കയുമില്ല. വിചാരണ കോടതി പരിശോധിച്ച ആ കേസില്‍ നിന്ന് ഡിസ്ചാര്‍ജ് ചെയ്തതാണ്. അത് ജുഡീഷ്യല്‍ തീരുമാനമായിരുന്നു. അതിനെതിരെ ഹൈക്കോടതിയില്‍ അപ്പീല്‍ നല്‍കിയപ്പോള്‍ ഹൈക്കോടതിയും അത് പരിശോധിച്ച് ശരിവെച്ചു.

 

പിണറായി വിജയന്‍ ഇപ്പോള്‍ ഒരു കേസിലും പ്രതിയല്ല. പ്രതിപക്ഷത്തിന് പല മോഹങ്ങളുമുണ്ടാകുമെന്നും മുഖ്യമന്ത്രി പറഞ്ഞു. ലാവ്‌ലിന്‍ കേസ് സുപ്രിംകോടതിയില്‍ നിലനില്‍ക്കുകയാണെന്നും കേസ് തീര്‍ന്നിട്ടില്ലെന്നും മുഖ്യമന്ത്രിയെ ഓര്‍മ്മിപ്പിച്ച് പ്രതിപക്ഷനേതാവ് രമേശ് ചെന്നിത്തല രംഗത്തെത്തി. സി.ബി.ഐ യുടെ അപ്പീലില്‍ കേസ് പലതവണ മാറ്റിവച്ചിരിക്കുകയാണ്. വിചാരണ കൂടാതെ ഒരാളെയും കുറ്റവിമുക്തനാക്കാന്‍ കഴിയില്ലെന്നാണ് നിയമം അനുശാസിക്കുന്നത്. കാലിതീറ്റകേസില്‍ സുപ്രിംകോടതി ലാലുപ്രസാദ് യാദവിനെ ശിക്ഷിച്ചത് ചൂണ്ടികാട്ടികൊണ്ടാണ് രമേശ് ചെന്നിത്തല മുഖ്യമന്ത്രിയെ തിരുത്തിയത്. നിങ്ങള്‍ പറയുന്ന സി.ബി.ഐയാണ് ഹൈക്കോടതിയില്‍ അപ്പീല്‍ പോയത്. വീണ്ടും അവര്‍ സുപ്രിംകോടതിയില്‍ പോയിരിക്കുകയാണ്. തനിക്ക് ഇക്കാര്യത്തില്‍ യാതൊരുവിധ ആശങ്കയുമില്ലെന്ന് മുഖ്യമന്ത്രി വ്യക്തമാക്കി. ലാവ്‌ലിന്‍ കേസ് പറയുമ്പോല്‍ സി.എ.ജി റിപ്പോര്‍ട്ടുമായി ബന്ധപ്പെടുത്തി ഭരണപക്ഷത്ത് നിന്ന് എസ് .ശര്‍മ്മ പാമൊയില്‍ കേസ് പരാമര്‍ശിച്ചുകൊണ്ട് രംഗത്ത് വന്നു. ഈ കേസില്‍ എടുത്തനിലപാട് ഓര്‍ക്കണമെന്ന് ശര്‍മ്മ ചൂണ്ടികാട്ടിയപ്പോള്‍ ശര്‍മ്മയാണോ അതോ എം.എം ഹസ്സനാണോ അന്ന് കൂടുതല്‍ താല്‍പര്യമെടുത്തതെന്ന് അറിയില്ലെന്ന് പാമൊയില്‍കേസ് സംബന്ധിച്ച് പ്രതിപക്ഷത്തെ കുത്താന്‍ മുഖ്യമന്ത്രിയും ഉപയോഗിച്ചു.