കൊച്ചി: സര്‍ക്കാരിന്റെ പരാജയം മറച്ചുവയ്ക്കാനാണ് ശബരിമല വിഷയം പിണറായി രാഷ്ട്രീയവല്‍ക്കരിച്ചതെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍.
സി.എം.പി 10-ാം പാര്‍ട്ടി കോണ്‍ഗ്രസിന്റെ ഭാഗമായി മതം, വിശ്വാസം, രാഷ്ട്രീയം എന്ന വിഷയത്തില്‍ സംഘടിപ്പിച്ച സിമ്പോസിയം ഉദ്ഘാടനം ചെയ്യുകയായിരുന്നു അദ്ദേഹം. പരാജിതരായ ഭരണാധികാരികളാണ് കലാപത്തെ ആശ്രയിക്കുന്നത്. ശബരിമല വിഷയത്തില്‍ മതേതര ജനാധിപത്യ പ്രസ്ഥാനം സ്വീകരിക്കേണ്ട നിലപാട് തന്നെയാണ് കോണ്‍ഗ്രസ് എടുത്തത്. എക്കാലത്തും കോണ്‍ഗ്രസിന്റെ നിലപാട് ഇതായിരുന്നു.
സ്വന്തം മതം മാത്രമാണ് ശരിയെന്ന് വിശ്വസിക്കുന്ന സമൂഹമാണ് ഇന്നുള്ളത്. ഇത് അപകടകരമാണ്. കേന്ദ്രത്തിലെ ബി.ജെ.പി സര്‍ക്കാര്‍ ഇത്തരം നിലപാടാണ് ആഗ്രഹിക്കുന്നതെന്നും മുല്ലപ്പള്ളി പറഞ്ഞു.
സി.എം.പി അസിസ്റ്റന്റ് സെക്രട്ടറി സി.എന്‍ വിജയകൃഷ്ണന്‍ അധ്യക്ഷത വഹിച്ചു. മഹാരാഷ്ട്ര മുന്‍ ഗവര്‍ണര്‍ കെ.ശങ്കരനാരായണന്‍, കെ. ചന്ദ്രന്‍പിള്ള, എം.എസ് കുമാര്‍ തുടങ്ങിയവര്‍ സംസാരിച്ചു.