കോഴിക്കോട്: മുത്വലാഖിനെ അംഗീകരിക്കുന്നില്ലെന്നും എന്നാല്‍ മുത്വലാഖ് ബില്ല് നടപ്പാക്കുന്ന രീതിയില്‍ ആശങ്കയുണ്ടെന്നും വനിതാ ലീഗ്. ഇതുസംബന്ധിച്ച് ഇന്ന് കോഴിക്കോട്ട് മുത്വലാഖ് സിംപോസിയം സംഘടിപ്പിക്കും. മുത്വലാഖ് ഭരണഘടനാ വിരുദ്ധമാണെന്ന് സുപ്രിംകോടതി വിധിച്ചിട്ടുണ്ടെന്നും ഈ വിധിയെ എതിര്‍ക്കുന്നില്ലെന്നും വനിതാ ലീഗ് ജന. സെക്രട്ടറി പി. കുല്‍സു കോഴിക്കോട് ലീഗ് ഹൗസില്‍ വാര്‍ത്താസമ്മേളനത്തില്‍ പറഞ്ഞു.
മുത്വലാഖ് ശരീഅത്ത് വിരുദ്ധമാണോ എന്ന് അഭിപ്രായമുണ്ടോയെന്ന ചോദ്യത്തിന് മുത്വലാഖിന്റെ ശരീഅത്ത് സാധുതയെക്കുറിച്ച്് സുപ്രിംകോടതി ജഡ്ജിമാരുടെ പാനല്‍ പഠിച്ചതാണെന്നും അവര്‍ക്കിടയിലും വ്യത്യസ്ത അഭിപ്രായമുണ്ടായിരുന്നുവെന്നും മുത്വലാഖ് നിരോധനത്തെ അംഗീകരിക്കുന്നുവെന്നുമായിരുന്നു അവരുടെ മറുപടി. എന്നാല്‍ മുത്വലാഖ് ബില്ലിനെ കുറിച്ച് ചില ആശങ്കകളുണ്ടെന്നും ഇതേക്കുറിച്ച് സിംപോസിയം ചര്‍ച്ച ചെയ്യുമെന്നും അവര്‍ വ്യക്തമാക്കി.
മുത്വലാഖ് ആര്‍ക്കുവേണ്ടി എന്ന ശീര്‍ഷകത്തില്‍ വനിതാലീഗ് സംസ്ഥാന കമ്മിറ്റി സംഘടിപ്പിക്കുന്ന സിംപോസിയം ഇന്ന് രാവിലെ 10ന് കോഴിക്കോട് ടൗണ്‍ഹാളില്‍ നടക്കും. ഇ.ടി മുഹമ്മദ് ബഷീര്‍ എം.പി ഉദ്ഘാടനം ചെയ്യും. കെ.പി.എ മജീദ് മുഖ്യ പ്രഭാഷണം നടത്തും.
ജനാധിപത്യത്തിലൂടെ ജനഹൃദയങ്ങളിലേക്ക് എന്ന പ്രമേയത്തില്‍ ഫെബ്രുവരി 16ന് കോഴിക്കോട് സി.എച്ച് ഓഡിറ്റോറിയത്തില്‍ സംഘടിപ്പിക്കുന്ന ജനപ്രതിനിധി സംഗമം പി.കെ കുഞ്ഞാലിക്കുട്ടി എം.പി ഉദ്ഘാടനം ചെയ്യും. പ്രതിപക്ഷ ഉപനേതാവ് ഡോ.എം.കെ മുനീര്‍ മുഖ്യ പ്രഭാഷണം നടത്തും. നവോത്ഥാനത്തിലെ സ്ത്രീ രാഷ്ട്രീയം എന്ന പ്രമേയത്തില്‍ നാലു മേഖലാ സമ്മേളനങ്ങള്‍ നടത്തുമെന്നും പി. കുല്‍സു അറിയിച്ചു. സംസ്ഥാന ഭാരവാഹികളായ പി. സഫിയ, സെറീന ഹസീബ്, ബ്രസീലിയ ഷംസുദ്ദീന്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു.