കൊച്ചി: വിജയ് ഹസാരെ ട്രോഫി പ്രീ ക്വാര്‍ട്ടര്‍ പോരാട്ടത്തില്‍ കേരളത്തിനു ആശ്വാസ ജയം. ആദ്യ അഞ്ചു മത്സരങ്ങളും തോറ്റ കേരളം അവസാന മത്സരത്തില്‍ ഹിമാചല്‍ പ്രദേശിനെ 42 റണ്‍സിനു പരാജയപ്പെടുത്തുകയായിരുന്നു. ആദ്യം ബാറ്റു ചെയ്ത കേരളം നിശ്ചിത 50 ഓവറില്‍ ഒന്‍പതു വിക്കറ്റ് നഷ്ടത്തില്‍ 297 റണ്‍സെന്ന മികച്ച സ്‌കോര്‍ സ്വന്തമാക്കി. വിജയം തേടിയിറങ്ങിയ ഹിമാചല്‍ 255നു പുറത്തായി. കട്ടക്ക് ബരാബതി സ്റ്റേഡിയത്തില്‍ നടന്ന മത്സരത്തില്‍ ടോസ് നേടിയ കേരളം ബാറ്റിങ് തിരഞ്ഞെടുക്കുകയായിരുന്നു. ഓപണര്‍മാരായ വിഷ്ണു വിനോദ് 98 പന്തില്‍ നിന്നു 93 റണ്‍സും മുഹമ്മദ് അസ്ഹറുദ്ദീന്‍ 66 പന്തില്‍ 73 റണ്‍സും വീതം നേടി. സഞ്ജു സാംസണ്‍ 44 പന്തില്‍ 51 റണ്‍സും ക്യാപ്റ്റന്‍ സച്ചിന്‍ ബേബി 41 റണ്‍സുമെടുത്തു.
മറുപടി ബാറ്റിങിനിറങ്ങിയ ഹിമാചലിനെതിരേ മികച്ച പ്രകടനമാണ് ബൗളര്‍മാരും പുറത്തെടുത്തത്. ഫാബിദ് അഹമ്മദ് 38 റണ്‍സ് വഴങ്ങി നാലു വിക്കറ്റുകള്‍ വീഴ്ത്തി. സന്ദീപ് വാര്യര്‍, കെ മോനിഷ്, വിനോദ് കുമാര്‍ എന്നിവര്‍ രണ്ടു വിക്കറ്റുകള്‍ വീതം വീഴ്ത്തി.
പ്രീ ക്വാര്‍ട്ടറിലെ ആറില്‍ അഞ്ചു മത്സരങ്ങളും തോറ്റ കേരളം ക്വാര്‍ട്ടര്‍ കാണാതെ പുറത്തായി. ഈ മാസം 13, 14, 16 തിയതികളിലായി ക്വാര്‍ട്ടര്‍ പോരാട്ടങ്ങള്‍ നടക്കും. ഒന്നാം ക്വാര്‍ട്ടറില്‍ കര്‍ണാടക- ബറോഡയുമായും രണ്ടാം മത്സരത്തില്‍ തമിഴ്‌നാട്- ഗുജറാത്തുമായും മൂന്നാം പോരാട്ടത്തില്‍ വിദര്‍ഭ- ജാര്‍ഖണ്ഡുമായും നാലാം മത്സരത്തില്‍ ബംഗാള്‍- മഹാരാഷ്ട്രയുമായും ഏറ്റുമുട്ടും.