തൊടുപുഴ: കളഞ്ഞുകിട്ടിയ സ്വര്‍ണണമാല ഉടമയ്ക്ക് തിരികെ നല്‍കി തൊഴിലാളി മാതൃകയായി. തൊടുപുഴ ടൗണില്‍ ടയര്‍ വര്‍ക്ക് നടത്തുന്ന നസീറിനാണ് സ്വര്‍ണമാല കളഞ്ഞുകിട്ടിയത്.
ഇലപ്പള്ളി സ്വദേശി മനോജിന്റെ മാലയാണ് കഴിഞ്ഞ 25ന് തൊടുപുഴയിലെ യാത്രയ്ക്കിടെ നഷ്ടമായത്. വെള്ളിയാഴ്ച ജുമുഅ നമസ്‌കാരം കഴിഞ്ഞ് പുളിമൂട്ടില്‍ പെട്രോള്‍ പമ്പിന് സമീപത്തുള്ള വക്കീലാഫിസിലേക്കുള്ള ഗോവണിപ്പടിയില്‍നിന്നാണ് രണ്ടരപവന്‍ തൂക്കമുള്ള മാല നസീറിന് ലഭിച്ചത്. നസീര്‍ അത് തൊട്ടടുത്ത വക്കീലാഫിസില്‍ ഏല്‍പിക്കുകയായിരുന്നു. മനോജ് കാഞ്ഞാര്‍ പൊലിസ് സ്‌റ്റേഷനില്‍ പരാതി നല്‍കുകയും ചെയ്തു. പിറ്റേദിവസം വക്കീലാഫീസില്‍ എത്തിയപ്പോഴാണ് മാല നസീര്‍ തന്നെ ഏല്‍പിച്ച വിവരം വക്കീല്‍ മനോജിനെ അറിയിച്ചത്.
ഏഴല്ലൂര്‍ കൈനിക്കല്‍ വീട്ടില്‍ നസീര്‍ ഐഎന്‍എല്‍ ഭാരവാഹിയാണ്. തുടര്‍ന്ന് ഐഎന്‍എല്‍ നോതാക്കളായ എം.എം സുലൈമാന്‍, കെ.എം ജബ്ബാര്‍, കെ.ജി കണ്ണന്‍ദാസ് എന്നിവര്‍ക്കൊപ്പം തൊടുപുഴ പൊലിസ് സ്‌റ്റേഷനിലെത്തി എസ്.ഐ വിഷ്ണുകുമാറിന്റെ സാന്നിധ്യത്തില്‍ മാല മനോജിന് കൈമാറി.