കുന്നംകുളം: ചൂണ്ടല്‍ പാറപ്പുറം ക്ഷേത്രത്തിന് മുന്‍പില്‍ കാര്‍ ബൈക്കിലിടിച്ച് രണ്ട് യുവാക്കള്‍ക്ക് പരുക്ക്. കേച്ചേരി എരനെല്ലൂര്‍ സ്വദേശികളായ വടക്കൂട്ട് കുമാരന്‍ മകന്‍ അനീഷ് (37), മടത്തിപറമ്പില്‍ രാജന്‍ മകന്‍ രജീഷ് (27), എന്നിവര്‍ക്കാണ് പരുക്കേറ്റത്.
തിങ്കളാഴ്ച വൈകീട്ട് 6 മണിയോടെയായിരുന്നു അപകടം. ജോലി കഴിഞ്ഞ് കുന്നംകുളത്ത് നിന്ന് കേച്ചേരിയിലേക്ക് പോകുകയായിരുന്ന യുവാക്കള്‍ സഞ്ചരിച്ച ബൈക്കില്‍ എതിര്‍ദിശയില്‍ നിന്ന് മറ്റൊരു വാഹനത്തെ മറികടന്നെത്തിയ ഷിഫ്റ്റ് കാര്‍ ഇടിക്കുകയായിരുന്നു.
ഇടിയുടെ ആഘാതത്തില്‍ ഇരുവരും കാറിന് മുകളിലേക്കും റോഡിലേക്കുമായി തെറിച്ച് വീണു. സാരമായി പരുക്കേറ്റ യുവാക്കളെ കേച്ചേരി ആക്ട്‌സ് പ്രവര്‍ത്തകര്‍ തൃശൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. അപകടത്തെ തുടര്‍ന്ന് തൃശൂര്‍ കുന്നംകുളം റൂട്ടില്‍ ഗതാഗതം സ്തംഭിച്ചു.