കോയമ്പത്തൂര്‍: വ്യാജ ഡി.ഡി നല്‍കി ആഡംബരകാര്‍ വാങ്ങാന്‍ ശ്രമിച്ച മൂന്നുപേരെ പൊലിസ് പിടികൂടി. ഈറോഡ് വെങ്കിടപതി (50), കുറിച്ചി ദിനേഷ് കുമാര്‍ (31), സൂലൂര്‍ പ്രഭാസ് (40) എന്നിവരെയാണ് പിടികൂടിയത്. കാര്‍ ഷോറും മാനേജര്‍ ശരവണന്റെ പരാതിയിലായിരുന്നു അറസ്റ്റ്.
ചിത്ര ഗോള്‍ഡ് വില്‍സിലെ കാര്‍ ഷോറൂമിലാണ് പത്താംതീയതി വെങ്കിടപതി കാര്‍ വാങ്ങുന്നതിനു വന്നത്. കാറുകളുടെ വിവിധ മോഡലുകള്‍ നോക്കിയശേഷം 27 ലക്ഷത്തി എണ്‍പതിനായിരം രൂപ വിലവരുന്ന കാര്‍ വാങ്ങാന്‍ തീരുമാനിച്ചു. 11ന് കടയിലെത്തി പണത്തിനായി ഡി.ഡി നല്‍കി. ഡി.ഡി പരിശോധിച്ച അക്കൗണ്ടന്റ് അത് വ്യാജമാണെന്നു കണ്ടെത്തി പീളമേട് പൊലിസിനു പരാതി നല്‍കി. തുടര്‍ന്നു പൊലിസെത്തി മൂന്നുപേരെയും പിടികൂടി. ദിനേഷ് കുമാറിന്റെ കംപ്യൂട്ടര്‍ സെന്ററിലാണ് അഞ്ഞൂറുരൂപയുടെ ഡിഡി 27 ലക്ഷം രൂപയുടെ വ്യാജ ഡിഡിയാക്കി മാറ്റിയതെന്ന് ചോദ്യം ചെയ്യലില്‍ വ്യക്തമായി. വെങ്കിടപതിയുടെ പേരില്‍ നിലവില്‍ വിവിധ കേസുകളുണ്ട്.