കോഴിക്കോട്: ഫെബ്രുവരി രണ്ട്, മൂന്ന് തിയതികളില്‍ മുക്കം കാരമൂല ദാറുസ്വലാഹ് ഇസ്‌ലാമിക് അക്കാദമിയില്‍ നടക്കുന്ന സമസ്ത കേരള ജംഇയ്യത്തുല്‍ മുഅല്ലിമീന്‍ ജില്ലാ കലാമേളയ്ക്ക് അന്തിമരൂപം നല്‍കി. ഫെബ്രുവരി രണ്ടിന് ഉച്ചയ്ക്ക് രണ്ടിന് സമസ്ത മുശാവറ അംഗം കെ. ഉമര്‍ ഫൈസി മുക്കം പതാക ഉയര്‍ത്തും. 2.30ന് നടക്കുന്ന ജില്ലാ ലീഡേഴ്‌സ് മീറ്റില്‍ സ്വാഗതസംഘം രക്ഷാധികാരി വി. മോയിമോന്‍ ഹാജി മുക്കം അധ്യക്ഷനാകും. കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി ഉദ്ഘാടനം ചെയ്യും. ഡോ. ബഹാഉദ്ദീന്‍ മുഹമ്മദ് നദ്‌വി മുഖ്യപ്രഭാഷണം നടത്തും.  എ.വി അബ്ദുറഹ്മാന്‍ മുസ്‌ലിയാര്‍, ആര്‍.വി കുട്ടിഹസന്‍ ദാരിമി, യു.കെ അബ്ദുല്‍ ലത്തീഫ് മൗലവി, നാസര്‍ ഫൈസി കൂടത്തായി, സലാം ഫൈസി മുക്കം, കെ. അബ്ദുല്‍ ബാരി ബാഖവി, കെ.പി കോയ, റശീദ് ഫൈസി വെള്ളായിക്കോട്, കെ.എന്‍.എസ് മൗലവി സംസാരിക്കും. എസ്.കെ.ജെ.എം സംസ്ഥാന സെക്രട്ടറി കെ.ടി ഹുസൈന്‍കുട്ടി മൗലവി മലപ്പുറം മുഖ്യാതിഥിയാകും.
മൂന്നിന് വൈകിട്ട് നടക്കുന്ന സമാപന സമ്മേളനം എസ്.കെ.എസ്.എസ്.എഫ് സംസ്ഥാന പ്രസിഡന്റ് പാണക്കാട് ഹമീദലി ശിഹാബ് തങ്ങള്‍ ഉദ്ഘാടനം ചെയ്യും. കെ.കെ ഇബ്‌റാഹിം മുസ്‌ലിയാര്‍ അധ്യക്ഷനാകും. മുബശ്ശിര്‍ തങ്ങള്‍ ജമലുല്ലൈലി സമ്മാനദാനം നിര്‍വഹിക്കും. കെ. മോയിന്‍കുട്ടി മാസ്റ്റര്‍, സി. മൂസ മാസ്റ്റര്‍, നടുക്കണ്ടി അബൂബക്കര്‍, സി.കെ കാസിം, നൂറുദ്ദീന്‍ ഫൈസി, ഒ.പി.എം അശ്‌റഫ് പങ്കെടുക്കും.

550 പ്രതിഭകള്‍ മാറ്റുരക്കും

കോഴിക്കോട്: സമസ്ത ജില്ലാ കലാമേളയില്‍ 550 കലാപ്രതിഭകള്‍ മാറ്റുരയ്ക്കും. ഫെബ്രുവരി മൂന്നിനു രാവിലെ 8.30 മുതല്‍ മത്സരങ്ങള്‍ ആരംഭിക്കും. ആറു വേദികളിലായി നടക്കുന്ന മത്സരങ്ങള്‍ വൈകിട്ട് സമാപിക്കും.