കൊണ്ടോട്ടി:കരിപ്പൂര്‍ വിമാനത്താവളത്തില്‍ 21.36 ലക്ഷത്തിന്റെ സ്വര്‍ണം പിടികൂടി. കോഴിക്കോട് നിന്നെത്തിയ പ്രിവന്റീവ് കസ്റ്റംസാണ് സ്വര്‍ണം പിടികൂടിയത്.മലപ്പുറം വേങ്ങര സ്വദേശി മങ്ങാടന്‍ യൂസുഫില്‍ നിന്നാണ് 648. 8 ഗ്രാം സ്വര്‍ണം കണ്ടെത്തിയത്. ദുബായില്‍ നിന്നുള്ള എയര്‍ഇന്ത്യ എക്‌സ്പ്രസ് വിമാനത്തിലാണ് ഇയാള്‍ കരിപ്പൂരിലെത്തിയത്. പരിശോധന കഴിഞ്ഞ് പുറത്തിറങ്ങവെ കോഴിക്കോട് നിന്നെത്തിയ പ്രിവന്റീവ് കസ്റ്റംസ് ഇയാളെ തടഞ്ഞുനിര്‍ത്തി പരിശോധിക്കുകയായിരുന്നു.
സ്വര്‍ണം ശരീരത്തില്‍ ഒളിപ്പിച്ച് കടത്താനാണ് ഇയാള്‍ ശ്രമിച്ചത്.സ്വര്‍ണം ക്യാപ്‌സ്യൂളുകളാക്കി കടത്താനായിരുന്നു ശ്രമം. അസിസ്റ്റന്റ് കമ്മിഷനര്‍ ഇ.പി ജോയ് തോമസ്, സൂപ്രണ്ടമാരായ എം. പ്രവീണ്‍, സി. പ്രദീപ്കുമാര്‍, കെ.കെ. മുഹമ്മദ് ഫൈസല്‍, സന്തോഷ് ജോണ്‍ എന്നിവരടങ്ങിയ സംഘമാണ് സ്വര്‍ണം പിടിച്ചത്