വളാഞ്ചേരി: ഇരുമ്പിളിയം സ്റ്റേഡിയത്തിനടുത്തു തൂതപ്പുഴയോരത്തെ കൈതക്കാട്ടിനിടയില്‍നിന്നു 500 ലിറ്ററോളം വാഷ് കുറ്റിപ്പുറം എക്‌സൈസ് ഇന്‍സ്‌പെക്ടര്‍ പി.എല്‍ ബിനുകുമാറിന്റെ നേതൃത്വത്തിലുളള എക്‌സൈസ് സംഘം കണ്ടെടുത്തു. ചാരായമുണ്ടാക്കാന്‍ മൂപ്പെത്തിയ രൂപത്തിലുള്ളതായിരുന്നു മുഴുവന്‍ വാഷും.
ഇരുമ്പിളിയം കണക്കര്‍കാവ് ഉത്സവം നടക്കുന്നതിനോടനുബന്ധിച്ച് പുഴയോരങ്ങളില്‍ ചിലര്‍ വ്യാജമദ്യ നിര്‍മാണത്തിനായി ശ്രമിക്കുന്നതായി വിവരം ലഭിച്ചതിന്റെ അടിസ്ഥാനത്തിലാണ് പരിശോധന നടന്നത്. എക്‌സൈസ് സംഘത്തെ കണ്ടമാത്രയില്‍ പ്രതികള്‍ പുഴയിലൂടെ മറുകരയിലേക്കു രക്ഷപ്പെട്ടു. എക്‌സൈസ് ഇന്‍സ്‌പെക്ടര്‍ക്കു പുറമേ അസിസ്റ്റന്റ് ഇന്‍സ്‌പെക്ടര്‍ കെ.വി രവീന്ദ്രനാഥ്, സിവില്‍ എക്‌സൈസ് ഓഫിസര്‍മാരായ ജലതീഷ്, എ. ഹംസ, സ്മിത, ഗണേശ് എന്നിവരാണ് സംഘത്തിലുണ്ടായിരുന്നത്..