കാസര്‍കോട്: അംഗീകൃത കടവുകളില്‍ മണല്‍ വാരാന്‍ അനുമതി നല്‍കുക, തൊഴിലാളികളെ സംരക്ഷിക്കുക, മണല്‍ കള്ളക്കടത്ത് തടയുക എന്നീ ആവശ്യങ്ങളുന്നയിച്ച് സ്വതന്ത്ര മണല്‍ തൊഴിലാളി യൂനിയന്‍ (എസ്.ടി.യു) ഫെബ്രുവരി അഞ്ചിന് കലക്ടറേറ്റ് ധര്‍ണ നടത്തും. നിരോധന കാലാവധി കഴിഞ്ഞിട്ടും മണല്‍ വാരല്‍ പുനരാരംഭിച്ചിട്ടില്ല. എന്നാല്‍ കള്ളകടവുകളില്‍ നിന്നും മണല്‍ വാരുകയും കള്ളക്കടത്ത് നിര്‍ബാധം തുടരുകയുമാണ്. ഇതുമൂലം അംഗീകൃത കടവുകളിലെ തൊഴിലാളികള്‍ പട്ടിണിയിലാവുകയും സര്‍ക്കാരിന് വരുമാനം നഷടപ്പെടുകയും ചെയ്യുന്നു. പ്രളയവും വെള്ളപ്പൊക്കവും മൂലം പുഴകളില്‍ അടിഞ്ഞുകൂടിയ മണല്‍ നീക്കം ചെയ്യാത്തത് കാരണമുള്ള പ്രശ്‌നങ്ങള്‍ നിരവധിയാണ്.
ഇക്കാര്യങ്ങള്‍ ചൂണ്ടിക്കാട്ടി അധികാരികള്‍ക്ക് നിവേദനങ്ങള്‍ നല്‍കിയിട്ടും നടപടി ഉണ്ടായില്ല. മണല്‍ മേഖലയിലെ മുഴുവന്‍ തൊഴിലാളികളും ധര്‍ണയില്‍ പങ്കെടുക്കണമെന്ന് സംഘാടക സമിതി ഭാരവാഹികളായ സക്കീര്‍ ചളിയങ്കോട്, മൊയ്തീന്‍ കുഞ്ഞി ചേരുര്‍, സെല്ലു കാസര്‍കോട് അഭ്യര്‍ഥിച്ചു.