മുംബൈ: രാജ്യത്തിലുടനീളം വന്‍ പ്രതിഷേധത്തിനിടയാക്കിയ പൗരത്വ നിയമ ഭേദഗതിയെ എതിര്‍ത്ത രണ്ടു ബി.ജെ.പി കൗണ്‍സിലര്‍മാരെ മഹാരാഷ്ട്ര പാര്‍ട്ടി ഘടകം സസ്‌പെന്‍ഡ് ചെയ്തു. സി.എ.എയ്‌ക്കെതിരായ പ്രമേയം പാസാക്കിയ സേലു മുനിസിപ്പല്‍ ചെയര്‍പേഴ്‌സണ്‍ വിനോദ് ബോറഡെ, പാളം മുനിസിപ്പല്‍ കൗണ്‍സില്‍ ഡെപ്യൂട്ടി ചെയര്‍മാന്‍ ബാല സാഹിബ് റോക്കഡെ എന്നിവര്‍ക്കെതിരേയാണ് അച്ചടക്ക നടപടി.
മഹാരാഷ്ട്ര ബി.ജെ.പി പ്രസിഡന്റ് ചന്ദ്രകാന്ത് പാട്ടീലാണ് ഇരുവരെയും സസ്‌പെന്‍ഡ് ചെയ്യുന്നതായി കത്ത് പുറപ്പെടുവിച്ചത്.
പൗരത്വ നിയമത്തിനെതിരേ വോട്ട് രേഖപ്പെടുത്തിയ ഇരു നേതാക്കളും അച്ചടക്ക ലംഘനം നടത്തിയെന്നു ചൂണ്ടിക്കാണിച്ചുള്ള കത്തില്‍ ചന്ദ്രകാന്ത് പാട്ടീലാണ് ഒപ്പുവച്ചിട്ടുള്ളത്. സസ്‌പെന്‍ഡ് ചെയ്ത കാര്യം ഉറപ്പിച്ച് ബി.ജെ.പി വക്താവ് കേശവ് ഉപാധ്യായ സസ്‌പെന്‍ഷന്‍ ലെറ്റര്‍ ട്വിറ്ററില്‍ പങ്കുവക്കുകയും ചെയ്തു. സസ്‌പെന്‍ഷന്‍ കാലാവധി വ്യക്തമാക്കാതെയാണ് കത്ത് പുറത്തുവിട്ടത്. പൗരത്വ നിയമത്തിനെതിരേ ഈ രണ്ടു തദ്ദേശസ്ഥാപനങ്ങളും പ്രമേയം പാസാക്കിയിരുന്നു.
ഫെബ്രുവരി 28നാണ് പ്രമേയം പാസാക്കിയത്. ബി.ജെ.പിക്കു കീഴിലുള്ള പര്‍ഭാനി ജില്ലയിലെ സേലു മുനിസിപ്പല്‍ കൗണ്‍സിലാണ് സി.എ.എക്കും എന്‍.ആര്‍.സിക്കും എന്‍.പി.ആറിനുമെതിരേ പ്രമേയം പാസാക്കിയത്. കൗണ്‍സിലര്‍ റഹീം ഷെയ്ഖ് മുന്നോട്ടുവച്ച പ്രമേയം 28 അംഗ കൗണ്‍സില്‍ പാസാക്കുകയായിരുന്നു. രണ്ടു ശിവസേനാ കൗണ്‍സിലര്‍മാര്‍ വോട്ടടുപ്പില്‍നിന്നു വിട്ടുനിന്നു. പ്രമേയത്തെ ആരും എതിര്‍ത്തില്ലെന്ന് കൗണ്‍സില്‍ ചെയര്‍മാന്‍ വിനോദ് ബെറോഡ് വ്യക്തമാക്കിയിരുന്നു