കരുവന്‍ചാല്‍: മൈലംപെട്ടിയില്‍ ആദിവാസി യുവാവ് കുത്തേറ്റ് മരിച്ച സംഭവത്തില്‍ പ്രതി പൊലിസ് പിടിയില്‍. മൈലംപെട്ടി സ്വദേശി പടനിലം ബാബു (50) ആണ് വലയിലായത്. വിഷം കഴിച്ചു എന്ന സംശയത്തെ തുടര്‍ന്ന് ഇയാളെ പരിയാരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. കഴിഞ്ഞ വ്യാഴാഴ്ചയായിരുന്നു നാടിനെ നടുക്കിയ സംഭവം.
പാറെമൊട്ട കോളനിയിലെ കണ്ണാരാജുവാണ് മരിച്ചത്. കൊലപാതകമാണെന്ന സൂചനയെ തുടര്‍ന്ന് പൊലിസ് നടത്തിയ അന്വേഷണത്തിലാണ് പ്രതി വലയിലായത്. ഒഴുക്ക് നിലച്ച തോട്ടിലെ കരിങ്കല്ലില്‍ കമിഴ്ന്നു കിടക്കുന്ന നിലയിലായിരുന്നു മൃതദേഹം. നെഞ്ചിലേറ്റ ആഴത്തിലുള്ള മുറിവാണ് മരണകാരണമെന്നായിരുന്നു പോസ്റ്റ്‌മോര്‍ട്ടം റിപ്പോര്‍ട്ട്. പ്രതിയെന്നു സംശയിക്കുന്ന ആളുടെ ചെരുപ്പും സംഭവസ്ഥലത്തുനിന്നും കണ്ടെടുത്തിരുന്നു. കൊലപാതകത്തിന് ശേഷം മുങ്ങിയ ബാബുവിനെ പയ്യാവൂരില്‍ വച്ചാണ് പിടികൂടിയത്.