മേപ്പാടി: കുന്നംമ്പറ്റയില്‍ പുലി ഇറങ്ങി വീട്ടില്‍ കെട്ടിയിട്ട പട്ടിയെ കടിച്ചുകൊന്നു. കുന്നംമ്പറ്റ എട്ടാം നമ്പര്‍ വയലില്‍ പാത്തുമ്മയുടെ വീട്ടിലെ പട്ടിയെയാണ് പുലി പിടിച്ചത്. കഴിഞ്ഞ ദിവസം രാത്രിയിലായിരുന്നു സംഭവം. പട്ടിയെ കടിച്ച് കൊണ്ടുപോയിട്ടുണ്ട്.
പിന്നീട് കൂട്ടമുണ്ട എസ്റ്റേറ്റില്‍ പട്ടിയുടെ ജഡാവശിഷ്ടങ്ങളും പുലിയുടെ കാല്‍പാടുകളും പ്രദേശത്ത് കണ്ടെത്തി. പുലി തന്നെയാണ് സ്ഥലത്ത് ഇറങ്ങിയതെന്ന് വനം വകുപ്പും സ്ഥിരീകരിച്ചിട്ടുണ്ട്. കഴിഞ്ഞ ഒരു മാസത്തോളമായി പ്രദേശത്ത് രാത്രി കാലങ്ങളില്‍ പുലിയുടെ അലര്‍ച്ച കേട്ടിരുന്നതായി പ്രദേശവാസികള്‍ പറയുന്നു. കൂട്ടമുണ്ട എസ്റ്റേറ്റില്‍ നിന്നുമാണ് പുലി ഇറങ്ങിയതെന്നാണ് നിഗമനം. പ്രദേശത്ത് കാട്ടാന ശല്യം രൂക്ഷമാണ്. ഇതിനിടയിലാണ് പുലി സാന്നിധ്യവും സ്ഥിരീകരിച്ചിരിക്കുന്നത്. ഇതോടെ നാട്ടുകാരുടെ ആശങ്ക വര്‍ധിച്ചിരിക്കുകയാണ്.