ലണ്ടന്‍: വടക്കാന്‍ ലണ്ടനിലെ ബാട്‌ലി ആന്റ് സ്‌പെന്‍ മണ്ഡലത്തില്‍ നിന്നുള്ള ബ്രിട്ടീഷ് പാര്‍ലമെന്റംഗം ജോ കോക്‌സ് ജനമധ്യത്തില്‍ വെടിയേറ്റു മരിച്ചു. പ്രതിപക്ഷ പാര്‍ട്ടിയായ ലേബര്‍ പാര്‍ട്ടിയുടെ വനിതാ എം.പിയാണ് 41 കാരിയായ ജോ. വെസ്റ്റ് യോര്‍ക്ഷറിലെ ബിര്‍സ്റ്റാളില്‍ ജനങ്ങളുമായുള്ള കൂടിക്കാഴ്ചക്കിടെയാണ് സംഭവം.

വെടിവയ്പ്പു നടത്തിയ 52 കാരന്‍ അറസ്റ്റിലായതായി വെസ്റ്റ് യോര്‍ക്ഷര്‍ പൊലിസ് പറഞ്ഞു. ഇയാളില്‍ നിന്ന് എം.പിയെ ആക്രമിക്കാന്‍ ഉപയോഗിച്ച ആയുധങ്ങള്‍ പിടിച്ചെടുത്തിട്ടുണ്ട്. ആക്രമണത്തിന്റെ കാരണം വ്യക്തമായിട്ടില്ല.

കുത്തിപ്പരുക്കേല്‍പ്പിച്ചശേഷം എം.പിക്കു നേരെ അക്രമി നിറയൊഴിക്കുകയായിരുന്നുവെന്നാണ് റിപ്പോര്‍ട്ട്. രണ്ടു തവണ നിറയൊഴിച്ചുവെന്നും വീണപ്പോള്‍ ചവിട്ടിയെന്നും ദൃക്‌സാക്ഷികള്‍ പറയുന്നു.