തിരുവനന്തപുരം: കെ.എസ്.ആര്‍.ടി.സി മിന്നല്‍ സമരത്തില്‍ ജീവനക്കാരെ പിന്തുണച്ചും പൊലിസിനെ കുറ്റപ്പെടുത്തിയും സി.പി.ഐ സംസ്ഥാന സെക്രട്ടറി.
ഉത്തരവാദികള്‍ പൊലിസും കെ.എസ്.ആര്‍.ടി.സി യൂണിയനുമാണെന്ന് കാനം രാജേന്ദ്രന്‍ പറഞ്ഞു. അറസ്റ്റ് നടന്ന 9.30നും സമരം തുടങ്ങിയ 11.30നും ഇടയ്ക്ക് സംഭവിച്ചത് എന്താണെന്ന് അന്വേഷിക്കണണെന്നും ഉത്തരവാദികള്‍ പോലിസ് ആണെങ്കില്‍ അവര്‍ക്കെതിരെ നടപടി എടുക്കണമെന്നും കാനം ആവശ്യപ്പെട്ടു.

നഗരത്തില്‍ മണിക്കൂറുകളോളം ഗതാഗതക്കുരുക്കിന് കാരണമായത് ബസുകള്‍ പാര്‍ക്ക് ചെയ്തതല്ല. കെ.എസ്.ആര്‍.ടിസി ബസ് റോഡിലല്ലാതെ പിന്നെ ആകാശത്ത് നിര്‍ത്തിയിടാന്‍ പറ്റുമോ എന്നും കാനം ചോദിച്ചു. മന്ത്രി കടകംപള്ളിക്കുള്ള മറുപടികൂടിയായാണ് അദ്ദേഹത്തിന്റെ മറുപടി. പ്രശ്‌നം വഷളാക്കിയതില്‍ പൊലിസിന്റെ പങ്കും അന്വേഷിക്കണമെന്നും അദ്ദേഹം ആവശ്യപ്പെട്ടു. മിന്നല്‍ പണിമുടക്ക് പാര്‍ട്ടി പ്രവര്‍ത്തകര്‍ അല്ലാത്തവര്‍ ചെയ്താലും തെറ്റ് തന്നെയെന്നും കാനം പറഞ്ഞു.