തളിപ്പറമ്പ്: കേരള ഫോട്ടോഗ്രാഫേഴ്‌സ് ആന്‍ഡ് വീഡിയോഗ്രാഫേഴ്‌സ് യൂനിയന്‍(സി.ഐ.ടി) ജില്ലാ സമ്മേളനത്തോടനുബന്ധിച്ച് ഫോട്ടോ പ്രദര്‍ശനവും പഴയകാല കാമറകളുടെ പ്രദര്‍ശനവും തളിപ്പറമ്പ് ടൗണ്‍ സ്‌ക്വയറില്‍ നടന്നു. ജില്ലയിലെ വിവിധ ഭാഗങ്ങളിലെ ഫോട്ടോഗ്രാഫര്‍മാരുടെ വൈവിധ്യങ്ങളായ ഇരുന്നൂറോളം ചിത്രങ്ങളാണ് പ്രദര്‍ശനത്തിലുണ്ടായിരുന്നത്. ലോകത്തിലെ ആദ്യകാല കാമറകളിലൊന്നായ ഫീല്‍ഡ് കാമറ ഉള്‍പ്പെടെ മാമിയ 220, യാഷിക, പോല്‍ റിവര്‍ എന്നീ പഴയകാല കാമറകളും പ്രദര്‍ശനത്തിലുണ്ടായിരുന്നു. ജില്ലാ പഞ്ചായത്ത് പ്രസിഡന്റ് കെ.വി സുമേഷ് ഉദ്ഘാടനം ചെയ്തു. സുധി ഏഴോം അധ്യക്ഷനായി. വൈകുന്നേരം ജലക്ഷാമം എന്ന വിഷയത്തില്‍ നടന്ന ചിത്രരചന ചിത്രകാരന്‍ വര്‍ഗീസ് കളത്തില്‍ ഉദ്ഘാടനം ചെയ്തു. പ്രിയന്‍ കാര്യമ്പലം അധ്യക്ഷനായി. അരക്കന്‍ ബാലന്‍, എ.വി പ്രകാശന്‍, ഉണ്ണികൃഷ്ണന്‍ മോറാഴ സംസാരിച്ചു. ഇന്ന് നടക്കുന്ന ജില്ലാ സമ്മേളനം എം.വി ജയരാജന്‍ ഉദ്ഘാടനം ചെയ്യും.