തളിപ്പറമ്പ്: കൊച്ചിയില്‍ പിടിയിലായ തൃക്കരിപ്പൂര്‍സ്വദേശി അബ്ദുല്‍ റഷീദ്(29) ഇരുപതോളം കേസുകളിലെ പ്രതിയെന്നു പൊലിസ്. പയ്യന്നൂര്‍, പരിയാരം, പഴയങ്ങാടി തളിപ്പറമ്പ് മേഖലകളിലെ നിരവധി കവര്‍ച്ചാക്കേസുകള്‍ക്കു പിന്നില്‍ ഇയാളാണെന്നു പൊലിസ് സംശയിക്കുന്നു. തൃക്കരിപ്പൂര്‍ കൈക്കോട്ടുകടവ് തക്കാക്കപ്പുരയില്‍ അബ്ദുല്‍ റഷീദ് കഴിഞ്ഞ ദിവസമാണ് എറണാകുളം പൊലിസിന്റെ പിടിയിലായത്. തളിപ്പറമ്പ് കെ.വി വേണുഗോപാലിന്റെ നേതൃത്വത്തില്‍ ഇയാളെ വിവിധ സ്‌റ്റേഷനുകളിലെത്തിച്ചു ചോദ്യം ചെയ്തു. പയ്യന്നൂര്‍ മേഖലയില്‍ നടന്ന പത്തോളം കവര്‍ച്ചകള്‍ക്കു പിന്നില്‍ താനാണെന്നു അബ്ദുല്‍റഷീദ് മൊഴി നല്‍കി. കഴിഞ്ഞ ഏപ്രിലില്‍ കോളോത്തെ മൈമൂനയുടെ വീട്ടില്‍ നിന്നു 20,000 രൂപയും വിലയേറിയ വാച്ചുകളും ഇയാള്‍ കവര്‍ന്നു. കണ്ടകുളങ്ങര ജനാര്‍ദനന്റെ വീട്ടില്‍ നിന്നും 40,000 രൂപയും മുക്കാല്‍ പവനും ആഗസ്റ്റില്‍ പയ്യന്നൂര്‍ മമ്പലത്തെ ലക്ഷ്മണന്റെ വീടുകുത്തി തുറന്ന് 1,70,000 രൂപയും ശ്രീപ്രഭ ഓഡിറ്റോറിയത്തിന് സമീപത്തെ ഡോ. കരുണാകരന്റെ വീട്ടില്‍ അഞ്ചുലക്ഷം രൂപയും ഇയാള്‍ കവര്‍ന്നതായി പൊലിസ് പറഞ്ഞു.