കൊച്ചി: പ്രധാനമന്ത്രി നരേന്ദ്ര മോദിക്കും ബി.ജെ.പി സര്‍ക്കാരിനും എതിരെ വിമര്‍ശനശരമെയ്തും തന്റെ വികസന കാഴ്ചപ്പാടുകള്‍ പങ്കുവച്ചും കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. കൊച്ചിയില്‍ കോണ്‍ഗ്രസ് നേതൃസംഗമത്തില്‍ പ്രവര്‍ത്തകരെ ആവേശംകൊള്ളിച്ചായിരുന്നു രാഹുലിന്റെ പ്രസംഗം.

നേരത്തെ പ്രഖ്യാപിച്ച രാജ്യത്തെ പാവപ്പെട്ടവര്‍ക്ക് മിനിമം വേതനം ഉറപ്പാക്കുമെന്ന വാഗ്ദാനം വീണ്ടും ഉയര്‍ത്തിക്കാട്ടി. പാവപ്പെട്ടവരുടെയും പണക്കാരുടെയും രാജ്യമായി നരേന്ദ്ര മോദി ഇന്ത്യയെ രണ്ടായി വിഭജിച്ചുവെന്ന് രാഹുല്‍ ഗാന്ധി പറഞ്ഞു. പാവപ്പെട്ടവര്‍ക്ക് മിനിമം വേതനം ഉറപ്പാക്കുമെന്ന പ്രഖ്യാപനവും അദ്ദേഹം ആവര്‍ത്തിച്ചു.

'മോദി അദ്ദേഹത്തിന്റെ 15 സുഹൃത്തുക്കള്‍ക്ക് മാക്‌സിമം വേതനം ഉറപ്പുനല്‍കി. നിങ്ങള്‍ അംബാനിയാണെങ്കില്‍ നിങ്ങള്‍ക്ക് മാക്‌സിമം വരുമാനം ലഭിക്കും. ഞങ്ങള്‍ എല്ലാ ഇന്ത്യക്കാര്‍ക്കും മിനിമം വരുമാനം വാഗ്ദാനം ചെയ്യുകയാണ്'- രാഹുല്‍ ഗാന്ധി പറഞ്ഞു.

കേരളത്തിലെ ജനങ്ങള്‍ ഇന്ത്യയിലെ ജനങ്ങളെ നയിക്കുന്നുവെന്ന കാര്യത്തില്‍ ഞാന്‍ അഭിമാനിക്കുന്നു. കേരളം വെറുമൊരു സംസ്ഥാനമല്ല, ഇതൊരു ആശയമാണ്. കാരുണ്യവും മനുഷ്യത്വവും ബഹുമാനവും ഉള്‍ക്കൊള്ളുന്നതാണ് കേരളം.

അധികാരത്തിലെത്തിയാല്‍ ജി.എസ്.ടി പൊളിച്ചെഴുതും. നിലവിലുള്ള ജി.എസ്.ടി സമ്പ്രദായം പാളിപ്പോയതാണെന്നും രാഹുല്‍ ഗാന്ധി പറഞ്ഞു.

രാജ്യത്തെ രണ്ടായി വിഭജിക്കണമെന്നാണ് നരേന്ദ്രമോദി ആഗ്രഹിക്കുന്നത്. ധനികരുടെ ഒരു ഇന്ത്യയും പാവപ്പെട്ടവരുടെയും കര്‍ഷകരുടെയും മറ്റൊരു ഇന്ത്യ. അതിന് കോണ്‍ഗ്രസ് അനുവദിക്കില്ല. ഇന്ത്യയെ ഒറ്റക്കെട്ടായി നമ്മള്‍ മുന്നോട്ടുകൊണ്ടുപോകും. മൂന്നരലക്ഷം കോടി രൂപ തന്റെ സുഹൃത്തുക്കളായ വ്യവസായികള്‍ക്കുവേണ്ടി ചെലവിട്ടു. എന്നാല്‍ ഒരുരൂപ പോലും കര്‍ഷകര്‍ക്കുവേണ്ടി ചെലവിട്ടില്ല. കേന്ദ്ര സര്‍ക്കാര്‍ തൊഴിലുറപ്പുപദ്ധതിയെയും ഭക്ഷ്യസുരക്ഷാപദ്ധതിയിലും വെള്ളംചേര്‍ത്തു. ഭൂമി ഏറ്റെടുക്കല്‍ നിയമത്തെ ദുര്‍ബലപ്പെടുത്താന്‍ ശ്രമിച്ചു.

Read more... തുടര്‍ന്നു പഠിക്കണം: രാഹുല്‍ ഗാന്ധിക്ക് മുമ്പില്‍ ആസിമെത്തി, വേണ്ടത് ചെയ്യുമെന്ന് ഉറപ്പ്

കര്‍ഷകര്‍ക്ക് ദുരന്തമായി ഭവിച്ചു. രാജ്യത്തിന്റെ ദീര്‍ഘകാല പുരോഗതിയാണ് കോണ്‍ഗ്രസിന്റെ ലക്ഷ്യം. വിഷപ്പിന്റെയും ദാരിദ്ര്യത്തിന്റെയും മതിലുകള്‍ ഹരിതവിപ്ലവത്തിലൂടെ തകര്‍ത്ത പാര്‍ട്ടിയാണ് കോണ്‍ഗ്രസ്. രണ്ടാം ഹരിത വിപ്ലവത്തിനാണ് കോണ്‍ഗ്രസിന്റെ ലക്ഷ്യം. ഒരു ദശാബ്ദക്കാലത്തിനകം ഇന്ത്യ ഭക്ഷ്യമേഖലയില്‍ സ്വയംപര്യാപ്തത കൈവരിക്കും. ധവള വിപ്ലവം ആവര്‍ത്തിക്കും… ലോകത്തിലെ ഏറ്റവും വലിയ പാലുല്‍പാദനരാജ്യമായി ഇന്ത്യ മാറും.