തിരുവനന്തപുരം: ശബരിമല കര്‍മസമിതിയുടെ ഹര്‍ത്താല്‍ ദിനം ഔട്ട്‌ലെറ്റുകള്‍ തുറക്കാത്തതിന് ജീവനക്കാര്‍ക്കെതിരേ നടപടിയുമായി ബിവറേജസ് കോര്‍പറേഷന്‍.
സംഭവത്തില്‍ ഔട്ട്‌ലെറ്റുകളിലെ മാനേജര്‍മാര്‍ക്ക് കോര്‍പറേഷന്‍ ചാര്‍ജ് മെമ്മോ നല്‍കി. ഔട്ട്‌ലെറ്റുകള്‍ തുറക്കാത്തതിനാല്‍ കോര്‍പറേഷനുണ്ടായ ലക്ഷങ്ങളുടെ നഷ്ടം ജീവനക്കാരില്‍നിന്ന് ഈടാക്കാനും നീക്കമുണ്ട്.
ഹര്‍ത്താല്‍ ദിനം ഔട്ട്‌ലെറ്റുകള്‍ തുറക്കാന്‍ ബിവറേജസ് കോര്‍പറേഷന്‍ എം.ഡി ജി.സ്പര്‍ജന്‍ കുമാര്‍ നിര്‍ദേശം നല്‍കിയിരുന്നു. എന്നാല്‍, സംസ്ഥാനത്തിന്റെ വിവിധ ഭാഗങ്ങളിലുള്ള പതിനഞ്ചോളം ഔട്ട്‌ലെറ്റുകള്‍ തുറന്നില്ല. ഇതിലൂടെ ഒരു ഷോപ്പിന് ഒന്നര ലക്ഷം മുതല്‍ മൂന്നര ലക്ഷം വരെ നഷ്ടമുണ്ടായതായാണ് കോര്‍പറേഷന്‍ ഓഡിറ്റ് വിഭാഗത്തിന്റെ കണ്ടെത്തല്‍. ഹര്‍ത്താല്‍ ദിനത്തില്‍ ഔട്ട്‌ലെറ്റ് തുറക്കാത്തതിന് ജീവനക്കാര്‍ക്ക് ചാര്‍ജ് മെമ്മോ നല്‍കുന്നത് കോര്‍പറേഷന്റെ ചരിത്രത്തില്‍ ആദ്യമായാണ്. ജീവനക്കാരുടെ വിശദീകരണം ലഭിച്ച ശേഷം കൂടുതല്‍ നടപടികളിലേക്ക് കടക്കാനാണ് തീരുമാനം. ഔട്ട്‌ലെറ്റ് മാനേജര്‍മാര്‍ക്ക് കാരണംകാണിക്കല്‍ നോട്ടിസ് നല്‍കിയതിന്റെ തുടര്‍നടപടിയായാണ് ഇപ്പോള്‍ ചാര്‍ജ് മെമ്മോ നല്‍കിയിരിക്കുന്നത്. 2018 ഒക്ടോബര്‍ അവസാനം നല്‍കിയ കാരണംകാണിക്കല്‍ നോട്ടിസിന് ഏഴുദിവസത്തിനകം മറുപടി നല്‍കാനാണ് നിര്‍ദേശിച്ചിരുന്നത്. ഇതിന് ജീവനക്കാര്‍ മറുപടി നല്‍കിയതിനുപിന്നാലെ ചാര്‍ജ് മെമ്മോ നല്‍കുകയായിരുന്നു. കേരള സിവില്‍ സര്‍വിസസ് (ക്ലാസിഫിക്കേഷന്‍, കണ്‍ട്രോള്‍ ആന്‍ഡ് അപ്പീല്‍) റൂള്‍സ് 1960, കേരള സംസ്ഥാന ബിവറേജസ് കോര്‍പറേഷന്‍ ജീവനക്കാരുടെ സേവനചട്ടങ്ങളിലെ 82(2), (6), (15), (74) വകുപ്പുകള്‍ അനുസരിച്ച് ശിക്ഷാ നടപടി സ്വീകരിക്കാതിരിക്കാന്‍ കാരണം ബോധിപ്പിക്കാനാണ് അറിയിച്ചിരിക്കുന്നത്.