പേരാമ്പ്ര: ഭരണഘടനാ മൂല്യങ്ങളെക്കുറിച്ചും മതനിരപേക്ഷതയെക്കുറിച്ചും അധ്യാപകര്‍ വിദ്യാര്‍ഥികളെ ബോധവല്‍ക്കരിക്കണമെന്ന് തൊഴില്‍ എക്‌സൈസ് മന്ത്രി ടി.പി രാമകൃഷ്ണന്‍. പാഠ്യേതര വിഷയമാണെങ്കില്‍ കൂടി ഇത്തരം മൂല്യങ്ങള്‍ കുട്ടികളിലെത്തിക്കുന്നതിന് അധ്യാപകര്‍ മുന്‍കൈയെടുക്കണമെന്ന് അദ്ദേഹം പറഞ്ഞു. പേരാമ്പ്ര ഗവ. യു.പി സ്‌കൂളില്‍ സ്മാര്‍ട് ക്ലാസ് റൂമിന്റെയും പുതിയ സ്‌കൂള്‍ കെട്ടിടത്തിന്റെയും ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം.
സ്‌കൂളുകള്‍ ഉന്നത നിലവാരത്തില്‍ എത്തുന്നതിന് പശ്ചാത്തല സൗകര്യം ഉണ്ടായാല്‍ മാത്രം പോര. അതു പൂര്‍ണമായും ഉപയോഗപ്പെടുത്താന്‍ അധ്യാപകരും ശ്രമിക്കണം. അധ്യാപകര്‍ കാര്യക്ഷമമായ പഠനത്തിന് വിധേയമാകണം. ഏതു വിഷയവും പഠിപ്പിക്കാന്‍ യോഗ്യത ഉള്ളവരായി ഓരോ അധ്യാപകരും മാറണം. ഓരോ കുട്ടിയുടെയും കുടുംബ സാഹചര്യം കൂടി മനസിലാക്കി അവരെ ഉയര്‍ത്തിക്കൊണ്ടുവരാന്‍ അധ്യാപകര്‍ സവിശേഷ ശ്രദ്ധ പുലര്‍ത്തണമെന്നും മന്ത്രി പറഞ്ഞു.
പേരാമ്പ്ര ജി.യു.പിയില്‍ നാല് ക്ലാസ് റൂമുകളാണ് സ്മാര്‍ട്ടായത്. രണ്ടു ക്ലാസ് റൂമുകള്‍ കൂടി ഈ വര്‍ഷം തന്നെ സ്മാര്‍ട്ടാക്കാന്‍ എം.എല്‍.എ എന്ന നിലയില്‍ സഹായം ചെയ്യുമെന്നും മന്ത്രി അറിയിച്ചു.
പേരാമ്പ്ര ബൈപ്പാസ് യാഥാര്‍ഥ്യമാകുന്നതിനു തടസമായി സ്വാഭാവികമായ നിയമപ്രശ്‌നങ്ങള്‍ മാത്രമാണ് ഉള്ളത്. ഇതിനു ഭൂമി വിട്ടുകൊടുക്കുന്നതുമായി ബന്ധപ്പെട്ട വിവരങ്ങള്‍ ശേഖരിച്ചു വരികയാണ്. ഇതു കിഫ്ബി അംഗീകരിച്ചാല്‍ ഉടന്‍ നിര്‍മാണ പ്രവര്‍ത്തനങ്ങള്‍ ആരംഭിക്കുമെന്നും അദ്ദേഹം പറഞ്ഞു.
പേരാമ്പ്ര ഗ്രാമ പഞ്ചായത്ത് 19 ലക്ഷവും കെ.കെ രാഗേഷ് എം.പി ഫണ്ടില്‍ നിന്ന് അനുവദിച്ച അഞ്ചു ലക്ഷവും മന്ത്രി ടി.പി രാമകൃഷ്ണന്റെ ഫണ്ടില്‍ നിന്ന് അനുവദിച്ച 1.39 ലക്ഷവും ഉള്‍പ്പെടെ 34 ലക്ഷത്തോളം രൂപ ചെലവഴിച്ച് 18 പദ്ധതികളാണ് സ്‌കൂളില്‍ പൂര്‍ത്തിയായിവരുന്നത്.
ചടങ്ങില്‍ പേരാമ്പ്ര ഗ്രാമ പഞ്ചായത്ത് പ്രസിഡന്റ് കെ.എം റീന അധ്യക്ഷയായി. പേരാമ്പ്ര എ.ഇ.ഒ പി. ഗോപാലന്‍ മുഖ്യപ്രഭാഷണം നടത്തി. സ്‌കൂള്‍ ലൈബ്രറി പ്രൊജക്ടിന്റെ ഉദ്ഘാടനം ജില്ലാ പഞ്ചായത്ത് മെംബര്‍ എ.കെ ബാലന്‍ നിര്‍വഹിച്ചു.
പ്രധാനാധ്യാപകന്‍ പി.കെ സുരേന്ദ്രന്‍ റിപ്പോര്‍ട്ട് അവതരിപ്പിച്ചു. പേരാമ്പ്ര ഗ്രാമ പഞ്ചായത്ത് വൈസ് പ്രസിഡന്റ് കെ.പി ഗംഗാധരന്‍, സ്ഥിരം സമിതി ചെയര്‍പേഴ്‌സണ്‍ ആലീസ് ചാണ്ടി, മെംബര്‍മാരായ കെ. രജീഷ് കുമാര്‍, ഗോപി മരുതോറ, പി.ടി.എ പ്രസിഡന്റ് കെ.കെ വിനോദ്കുമാര്‍, സീനിയര്‍ അസിസ്റ്റന്റ് ടി. ശീവല്ലി, ബി.പി.ഒ കെ.വി വിനോദന്‍, സ്വാഗതസംഘം വൈസ് ചെയര്‍മാന്‍ സന്തോഷ് സായി തുടങ്ങിയവരും വിവിധ രാഷ്ട്രീയ പാര്‍ട്ടി പ്രതിനിധികളും സംബന്ധിച്ചു.