ഗാല്ലെ: ബംഗ്ലാദേശിനെതിരായ ഒന്നാം ക്രിക്കറ്റ് ടെസ്റ്റില്‍ ശ്രീലങ്ക ശക്തമായ സ്‌കോറിലേക്ക്. ആദ്യ ദിനം കളി നിര്‍ത്തുമ്പോള്‍ ലങ്ക നാലു വിക്കറ്റ് നഷ്ടത്തില്‍ 321 റണ്‍സെന്ന നിലയില്‍. സെഞ്ച്വറി (166) നേടി പുറത്താകാതെ നില്‍ക്കുന്ന കുശാല്‍ മെന്‍ഡിസിന്റെ കരുത്തുറ്റ ഇന്നിങ്‌സാണു ലങ്കയ്ക്ക് മികച്ച സ്‌കോര്‍ സമ്മാനിച്ചത്. 92 റണ്‍സ് ചേര്‍ക്കുന്നതിനിടെ മൂന്നു വിക്കറ്റുകള്‍ നഷ്ടപ്പെട്ട അവരെ മെന്‍ഡിസും 85 റണ്‍സെടുത്തു പുറത്തായ ഗുണവര്‍ധനെയും ചേര്‍ന്നു കരകയറ്റുകയായിരുന്നു. 242 പന്തുകള്‍ നേരിട്ടു 18 ഫോറും രണ്ടു സിക്‌സും പറത്തിയാണു കരിയറിലെ രണ്ടാം ടെസ്റ്റ് സെഞ്ച്വറി മെന്‍ഡിസ് സ്വന്തമാക്കിയത്. കരുണരത്‌നെ (30), തരംഗ (നാല്), ചാന്‍ഡിമല്‍ (അഞ്ച്), ഗുണവര്‍ധനെ (85) എന്നിവരുടെ വിക്കറ്റുകളാണു ലങ്കയ്ക്ക് നഷ്ടമായത്. കളി നിര്‍ത്തുമ്പോള്‍ 14 റണ്‍സുമായി ഡിക്ക്‌വെല്ലയാണു മെന്‍ഡിസിനൊപ്പം ക്രീസില്‍. ബംഗ്ലാദേശിനായി മുസ്തഫിസുര്‍ റഹ്മാന്‍, ടസ്‌കിന്‍ അഹമദ്, സുബാശിഷ് റോയ്, മെഹ്ദി ഹസന്‍ എന്നിവര്‍ ഓരോ വിക്കറ്റ് വീഴ്ത്തി.