തിരുവനന്തപുരം: 'നിശബ്ദരാവില്ല നേരിന്റെ പെണ്‍പക്ഷം' എന്ന പ്രമേയവുമായി എം.എസ്.എഫ് വിദ്യാര്‍ഥിനി വിഭാഗമായ 'ഹരിത'യുടെ കാംപയിനിന് ലോക വനിതാദിനമായ ഇന്ന് തിരുവനന്തപുരത്തു തുടക്കമാവുമെന്നു ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. മെയ് എട്ടുവരെ നീണ്ടുനില്‍ക്കുന്ന പരിപാടിയുടെ ഉദ്ഘാടനം ഇന്ന് വൈകീട്ടു മൂന്നിന് തിരുവനന്തപുരം പേരൂര്‍ക്കട ലോ അക്കാദമിയില്‍ നടക്കും. ലോ അക്കാദമി സമരത്തിനു നേതൃത്വം നല്‍കിയ വിദ്യാര്‍ഥിനികള്‍ ഉദ്ഘാടനം നിര്‍വഹിക്കും.
പരിപാടിയുടെ ഭാഗമായി മെയ് എട്ടുവരെ സംസ്ഥാനത്തെ വിവിധ കാംപസുകളിലും ഗ്രാമ-നഗരപ്രദേശങ്ങളിലും സെമിനാറുകള്‍, വനിതാ പാര്‍ലമെന്റ്, പെണ്‍കൂട്ടായ്മകള്‍, അവകാശപത്രിക സമര്‍പ്പണം, ലഘുലേഖ വിതരണം എന്നിവ നടക്കുമെന്ന് സംസ്ഥാന പ്രസിഡന്റ് ഫാത്തിമ തഹ്‌ലിയ പറഞ്ഞു. ജനറല്‍ സെക്രട്ടറി മുഫീത തസ്‌നി, വൈസ് പ്രസിഡന്റ് അഡ്വ.ബുഷ്‌റാ ഹാരിസ് എന്നിവരും വാര്‍ത്താസമ്മേളനത്തില്‍ പങ്കെടുത്തു.