റിയാദ്: ആഴക്കടലില്‍ നിന്നു കൂട്ടം തെറ്റി തീരപ്രദേശത്തോടടുത്ത ഡോള്‍ഫിനുകള്‍ക്ക് സഊദി നാവിക ഗാര്‍ഡുകള്‍ രക്ഷകരായി. പത്ത് ഡോള്‍ഫിനുകളെയാണ് രക്ഷപ്പെടുത്തിയത്. ആഴക്കടലിലേക്ക് വഴികാട്ടാനായി വളണ്ടിയര്‍ സംഘത്തോടൊപ്പം സഊദി പ്രകൃതി, വെള്ള, കാര്‍ഷിക മന്ത്രാലയവും മൃഗ സംരക്ഷണ അതോറിറ്റിയും ജിദ്ദ കിങ് അബ്ദുള്ള ഇക്കണോമിക് സിറ്റി ബോര്‍ഡര്‍ ഗാര്‍ഡുകളും അനുഗമിച്ചതായി മന്ത്രാലയ അണ്ടര്‍ സെക്രട്ടറി അഹ്മദ് അല്‍ അയാദ പറഞ്ഞു.
ചെങ്കടല്‍ തീരത്തെ ജിദ്ദ റാബിഗിലെ കിങ് അബ്ദുള്ള ഇക്കണോമിക് സിറ്റി തീരപ്രദേശത്താണ് കഴിഞ്ഞ ദിവസം ഡോള്‍ഫിനുകള്‍ വഴി തെറ്റിയെത്തിയത്. ആഴം കൂടിയ സ്ഥലത്ത് നിന്നും ഇവ തീരപ്രദേശത്തെ ആഴം കുറഞ്ഞ പ്രദേശത്തേക്ക് കയറുകയായിരുന്നു.
ഭക്ഷണം കിട്ടാത്തതിനാല്‍ ജീവന്‍ അപകടത്തിലായ ഇവയില്‍ ചിലതിനെ ബലം പ്രയോഗിച്ചാണ് ആഴക്കടലിലേക്ക് നീക്കിയതെന്ന് ജിദ്ദ ഫിഷറീസ് തലവന്‍ റദ അല്‍ സഹ്‌റാനി പറഞ്ഞു.