കല്ലമ്പലം: കിലയുടെ കണ്‍സള്‍ട്ടന്‍സിയില്‍ ഐഎസ്ഒ അംഗീകാരം നേടുന്ന ജില്ലയിലെ ആദ്യത്തേയും സംസ്ഥാനത്തെ നാലാമത്തേയും പഞ്ചായത്തായി ഒറ്റൂര്‍.  ഇതോടെ പൊതുജനങ്ങള്‍ക്ക് മെച്ചപ്പെട്ട സേവനവും അടിസ്ഥാന സൗകര്യ വികസനവും പഞ്ചായത്ത് ഉറപ്പാക്കിയിട്ടുണ്ട്. സേവനങ്ങള്‍ എളുപ്പത്തില്‍ ലഭ്യമാക്കുന്നതിനായി വെബ്‌സൈറ്റ്, സോഷ്യല്‍ മീഡിയ തുടങ്ങിയ സംവിധാനങ്ങള്‍ ഏര്‍പ്പെടുത്തുകയും രജിസ്‌ട്രേഷന്‍, കെട്ടിടനിര്‍മാണം, പെന്‍ഷന്‍, നികുതിപിരിവ് തുടങ്ങിയവയെല്ലാം കംപ്യൂട്ടര്‍ വല്‍ക്കരണത്തിലാക്കുകയും ചെയ്തു. പഞ്ചായത്തിലെ ഫയലുകള്‍ മറ്റും പൊതുജനങ്ങള്‍ക്ക് മനസിലാകും വിധത്തിലുള്ള സോഫ്റ്റ്‌വെയറിലാക്കുകയും പേപ്പര്‍ രഹിത ഓഫീസ് എന്ന ലക്ഷ്യത്തിലേക്ക് നീങ്ങുകയുമാണ് പഞ്ചായത്ത്. ഒരു കാലത്ത് നെല്‍കൃഷിയുടെ കലവറയായിരുന്ന ഒറ്റൂരിലെ പാടങ്ങള്‍ ഇടക്കാലത്ത് തരിശായി കൃഷി നശിച്ചു.
എന്നാല്‍ അതിനെ പഴയ പ്രതാപത്തിലേക്ക് കൊണ്ട് വരാനുള്ള ശ്രമങ്ങളുടെ ഭാഗമായി 50 ഹെക്ടറില്‍ നെല്‍കൃഷി പുനരാരംഭിച്ചു. ലോക ബാങ്കിന്റെ തദ്ദേശ മിത്രം പരിപാടിയില്‍ പഞ്ചായത്തിന് ലഭിച്ച 2 കോടി രൂപയില്‍ 50 ലക്ഷം രൂപ ചിലവിട്ട് ഒറ്റൂര്‍ പിഎച്ച്‌സി ആധുനികവല്‍ക്കരിച്ചു. 86 ലക്ഷം രൂപ ചിലവില്‍ മാവിന്‍മൂട്, ഞെക്കാട് എല്‍പിസ്‌കൂളുകള്‍ ഹൈടെക്കാക്കി. 50 ലക്ഷം ചിലവിട്ട് കൂട്ടിക്കട വലിയള ഭഗവതിപുരം റോഡ് പൂര്‍ത്തിയാക്കി. വാര്‍ഷിക പദ്ധതിയിലെ നവജീവനം പദ്ധതിയിലൂടെ 60 വയസ് കഴിഞ്ഞവര്‍ക്ക് യോഗ, ഫിസിയോ തെറാപ്പി എന്നിവ നടത്തിവരുന്നു. പിഎച്ച്‌സിയോടനുബന്ധിച്ച് ഫിറ്റ്‌നസ് സെന്ററും പ്രവര്‍ത്തിക്കുന്നു.
എം.എല്‍.എ ഫണ്ടില്‍ നിന്നും അനുവദിച്ച ഇന്‍ഡോര്‍ സ്റ്റേഡിയത്തിന്റെ പണികള്‍ പുരോഗമിക്കുകയാണ്. വലിയ സാമ്പത്തിക സ്രോതസുകളില്ലെങ്കിലും ലഭ്യമായ വിഭവങ്ങള്‍ പരമാവധി വിനിയോഗിച്ച് വിജയം നേടാനായതും കഴിഞ്ഞ സാമ്പത്തിക വര്‍ഷം 100 ശതമാനം നികുതിപിരിവും 100 ശതമാനം പദ്ധതി വിനിയോഗവും നടത്താനായതും നേട്ടമാണെന്ന് പഞ്ചായത്ത് പ്രസിഡന്റ് ആര്‍. സുഭാഷ് പറഞ്ഞു.