തിരുവനന്തപുരം: സര്‍വേ ഡയറക്ടര്‍ വി.ആര്‍ പ്രേംകുമാറിന്റെ സ്ഥലംമാറ്റത്തില്‍ സര്‍ക്കാരിനെതിരെ പ്രമേയം പാസാക്കി ഐ.എ.എസ് അസോസിയേഷന്‍.
സംസ്ഥാനത്തെ കേഡര്‍ മാനേജ്‌മെന്റില്‍ അതൃപ്തി രേഖപ്പെടുത്തിക്കൊണ്ടാണ് പ്രമേയം. സര്‍ക്കാരിന്റെ സിവില്‍ സര്‍വിസ് കേഡര്‍ മാനേജ്‌മെന്റ് ശരിയല്ലെന്നും ഉദ്യോഗസ്ഥരെ അടിക്കടി മാറ്റുന്നത് ഭരണസംവിധാനത്തെ ബാധിക്കുമെന്നും അസോസിയേഷന്‍ പ്രമേയത്തില്‍ കുറ്റപ്പെടുത്തി. ഇന്നലെ ചേര്‍ന്ന ഐ.എ.എസ് അസോസിയേഷന്റെ മാനേജിങ് കമ്മറ്റി യോഗത്തിലാണ് പ്രമേയം അവതരിപ്പിച്ചത്. സര്‍വഡയറക്ടര്‍ സ്ഥാനത്തുനിന്നുള്ള പ്രേംകുമാറിന്റെ മാറ്റമാണ് ഈ യോഗത്തിലെ പ്രധാന ചര്‍ച്ചാവിഷയമായത്. സംസ്ഥാനത്ത് സിവില്‍ സര്‍വിസ് കേഡര്‍ മാനേജ്‌മെന്റ് ഫലപ്രദമല്ലാത്തതു കൊണ്ടാണ് ഇങ്ങനെ സംഭവിക്കുന്നതെന്ന് യോഗം കുറ്റപ്പെടുത്തി.
ജൂനിയര്‍ ഓഫിസര്‍മാരെ അടിക്കടി മാറ്റുന്നു. അവര്‍ക്ക് ഒരു സ്ഥാനത്തിരുന്ന് പഠിക്കാനുള്ള സാവകാശം പോലും ലഭിക്കാത്ത സാഹചര്യമാണുള്ളത്. ഒരു ഉദ്യോഗസ്ഥനെ കുറഞ്ഞത് രണ്ടുവര്‍ഷമെങ്കിലും ഒരു സ്ഥാനത്ത് തുടരാന്‍ അനുവദിക്കണമെന്ന് 2014ല്‍ കേന്ദ്ര പേഴ്‌സണല്‍ മന്ത്രാലയം നിര്‍ദേശം പുറപ്പെടുവിച്ചതാണ്. അത്തരം നിര്‍ദേശങ്ങളെ കാറ്റില്‍ പറത്തുന്ന നടപടിയാണ് കേരളത്തില്‍ നടക്കുന്നത്. ഇക്കാര്യത്തില്‍ ഐ.എ.എസ്. അസോസിയേഷന്റെ നേതൃത്വത്തിനും വീഴ്ചയുണ്ടാകുന്നുണ്ടെന്ന വിമര്‍ശനവും മാനേജിങ് കമ്മിറ്റി യോഗത്തില്‍ ഉയര്‍ന്നു.