മുംബൈ: യെസ് ബാങ്ക് സ്ഥാപകനും മുന്‍ സി.ഇ.ഒയുമായ റാണ കപൂറിനെ എന്‍ഫോഴ്‌സ്‌മെന്റ് ഡയറക്ടറേറ്റ് അറസ്റ്റ് ചെയ്തു. രണ്ട് ദിവസത്തെ ചോദ്യം ചെയ്യലിനൊടുവിലാണ് അറസ്റ്റ്. ബാങ്കിലെ വായ്പാ ഇടപാടിലെ സംശയത്തിന്റെ പശ്ചാത്തലത്തിലാണ് വെള്ളിയാഴ്ച രാത്രി മുതല്‍ ഡല്‍ഹിയിലും മുംബൈയിലുമായി റാണ കപൂറിന്റെയും മക്കളുടെയും വീടുകളില്‍ ഇ.ഡി പരിശോധന നടത്തിയത്.
റാണ സി.ഇ.ഒ ആയിരിക്കെ സാമ്പത്തിക, റിയല്‍ എസ്‌റ്റേറ്റ് സ്ഥാപനമായ ഡി.എച്ച്.എഫ്.എലുമായി ക്രമവിരുദ്ധ ഇടപാട് നടത്തിയെന്ന സംശയത്തില്‍ കള്ളപ്പണം തടയല്‍ നിയമപ്രകാരമാണ് നടപടി. അതിനിടെ റാണ കപൂറിന്റെ മകള്‍ റോഷ്‌നി കപൂറിനെ ലണ്ടനിലേക്ക് കടക്കാന്‍ ശ്രമിക്കുന്നതിനിടെ മുംബൈ വിമാനത്താവളത്തില്‍ തടഞ്ഞുവച്ചു.