പട്ടാമ്പി: സ്വകാര്യ സ്‌കൂളിന് വേണ്ടി തദ്ദേശ ഭരണ സ്വാധീനം ഉപയോഗിച്ച് വ്യാജരേഖ ചമച്ച കേസില്‍ അന്വേഷണം നേരിടുന്ന നഗരസഭ ചെയര്‍മാന്‍ കെ.എസ്.ബി.എ തങ്ങള്‍ രാജിവയ്ക്കണമെന്ന് ആവശ്യപ്പെട്ട് നഗരസഭ ബോര്‍ഡ് യോഗത്തില്‍ നിന്ന് സി.പി.എം അംഗങ്ങള്‍ ഇറങ്ങിപോയി. 2013-14 കാലത്താണ് നിലം എന്നത് തിരുത്തി വ്യാജരേഖ ചമച്ച് സ്‌കൂള്‍ കെട്ടിടം നിര്‍മിച്ചതെന്നും ഇതു സംബന്ധിച്ച് വിജിലന്‍സ് കേസ് എടുത്ത് അന്വേഷണം നടത്തുകയും പരാതി സംശയാതീതമായി തെളിഞ്ഞതായും നേതാക്കള്‍ ചൂണ്ടിക്കാട്ടി.
സ്വകാര്യ സ്‌കൂളിന്റെ സെക്രട്ടറിയായിരിക്കെ നടന്ന സംഭവത്തിന്റെ ഉത്തരവാദിത്വം ഏറ്റെടുത്ത് നഗരസഭ ചെയര്‍മാന്‍ കെ.എസ്.ബി.എ തങ്ങള്‍ സ്ഥാനമൊഴിയണമെന്നും കൗണ്‍സിലര്‍മാര്‍ ആവശ്യപ്പെട്ടു.
വ്യാജരേഖ ചമച്ചതായ പരാതി അന്വേഷിച്ച വിജിലന്‍സ്, പ്രതികളായ അഞ്ചു പേരും കുറ്റക്കാരാണെന്ന് കണ്ടെത്തുകയും പ്രതികള്‍ക്കെതിരേ ജാമ്യമില്ലാ വകുപ്പ് ചേര്‍ത്ത് കേസെടുക്കാന്‍ പൊലിസിന് നിര്‍ദേശം നല്‍കിയതായും നേതാക്കള്‍ പറഞ്ഞു.
പ്രതികള്‍ക്കെതിരേ കേസ് രജിസ്റ്റര്‍ ചെയ്ത സാഹചര്യത്തില്‍ കെ.എസ്.ബി.എ തങ്ങള്‍ രാജിവയ്ക്കണമെന്നും രാജിവയ്ക്കും വരെ പ്രക്ഷോഭം തുടരുമെന്നും കൗണ്‍സിലര്‍മാര്‍ പറഞ്ഞു.