ഉടുമ്പന്നൂര്‍:  പെരുന്തേനീച്ചയുടെ കുത്തേറ്റ് തൊഴിലുറപ്പ് തൊഴിലാളികള്‍ക്ക് പരിക്ക്.  സാരമായി പരിക്കേറ്റ 10 പേരെ വിവിധ ആശുപത്രികളില്‍  പ്രവേശിപ്പിച്ചു.
ഗോപി കുഴിയാമറ്റത്തില്‍ (58), കുമാരി കുഴിയാമറ്റത്തില്‍ (40), ശ്യാമള കുഴിയാമറ്റത്തില്‍ (45), കാര്‍ത്യായനി ഉറുമ്പില്‍ (52), കമല കുഴിയാമറ്റത്തില്‍ (58), ബ്രജീത്ത ജോസ് കൊല്ലറയ്ക്കല്‍ (55), ഓമന ഇല്ലിക്കല്‍ (54) എന്നിവരെ കരിമണ്ണൂര്‍ സെന്റ് മേരീസ് ആശുപത്രിയിലും മിനി വിശ്വനാഥന്‍ വലിയവീട്ടില്‍ (42) തൊടുപുഴ  ജില്ലാ  ആശുപത്രിയിലും ഏലിക്കുട്ടി  ജോര്‍ജ് പുതുമനയില്‍ (50), ഏലിക്കുട്ടി ചാര്‍ളി മൊറായില്‍ (52) എന്നിവരെ കരിമണ്ണൂര്‍  സര്‍ക്കാര്‍ പ്രാഥമികാരോഗ്യ കേന്ദ്രത്തിലുമാണ് പ്രവേശിപ്പിച്ചത്.
ഇന്നലെ രാവിലെ ഒമ്പതരയോടെയാണ് സംഭവം. മലയിഞ്ചി പറയാമലയ്ക്ക് സമീപം പടിഞ്ഞാറേക്കൂറ്റ് അപ്പച്ചന്റെ പുരയിടത്തില്‍ പണിക്കിറങ്ങിയ തൊഴിലാളികളെയാാണ് പെരുന്തേീച്ച ആക്രമിച്ചത്.
പുരയിടം തെളിക്കുന്ന ജോലിയില്‍ തൊഴിലാളികള്‍ ഏര്‍പ്പെട്ടരിക്കെ അടുത്തുനിന്ന ചീനിമരത്തിലെ തേനീച്ചകളെ പരുന്ത് ഇളക്കിയതാണെന്ന് കരുതുന്നു. 32 പേരാണ് ജോലിക്കുണ്ടായിരുന്നത്്. ഇതില്‍ മിക്കവര്‍ക്കും തേനീച്ചകളുടെ കുത്തേറ്റിട്ടുണ്ട്. മറ്റുള്ളവരെ പ്രാഥമിക ചികിത്സനല്‍കി വിട്ടയച്ചു.