കാസര്‍കോട്: ജില്ലയില്‍ ദേശീയ പാത17 നാലുവരി പാതയാക്കുന്നതിനുളള ഭൂമി ഏറ്റെടുക്കുന്നതിനുള്ള നടപടികള്‍ ഉടന്‍ ആരംഭിക്കും. പൊതുമരാമത്ത് വകുപ്പ് അഡിഷണല്‍ ചീഫ് സെക്രട്ടറി സുബ്രതാ ബിശ്വാസിന്റെ അധ്യക്ഷതയില്‍ കലക്ടറേറ്റ് മിനി കോണ്‍ഫറന്‍സ് ഹാളില്‍ ചേര്‍ന്ന ഉദ്യോഗസ്ഥതല യോഗത്തിലാണു തീരുമാനം.  
110 ഹെക്ടര്‍ സ്ഥലമാണ് ജില്ലയില്‍ ദേശീയപാതാ വികസനത്തിനായി ഏറ്റെടുക്കുക. ഇതില്‍ 66 ഹെക്ടര്‍ ഏറ്റെടുക്കുന്നതിനുള്ള പ്രാഥമിക നടപടികള്‍ പൂര്‍ത്തിയായി. 35.5 ഹെക്ടര്‍ ഭൂമി ഏറ്റെടുക്കുന്നതിനുളള നടപടികള്‍ ഉടന്‍ ആരംഭിക്കും.  ജൂലൈ 31 നകം സര്‍വേ നടപടികള്‍ പൂര്‍ത്തിയാക്കും. കെട്ടിടങ്ങളുടെ മൂല്യ നിര്‍ണയം സമയബന്ധിതമായി പൂര്‍ത്തിയാക്കുന്നതിന് പൊതുമരാമത്ത് വകുപ്പ് എക്‌സിക്യുട്ടിവ് എന്‍ജിനീയര്‍മാരെ മഞ്ചേശ്വരം, ഹൊസ്ദുര്‍ഗ്, കാസര്‍കോട് താലൂക്കുകളിലായി ചുമതലപ്പെടുത്തി.
മുഖ്യമന്ത്രി ഏറ്റവും പ്രധാന പരിഗണന നല്‍കുന്ന വിഷയമാണു ദേശീയപാതാ വികസനമെന്നും കാസര്‍കോടു നിന്നു നിര്‍മാണമാരംഭിക്കുന്നതിനാണ് പ്രഥമ പരിഗണനയെന്നും അഡിഷണല്‍ ചീഫ് സെക്രട്ടറി വ്യക്തമാക്കി. ഭൂമി ഏറ്റെടുക്കല്‍ നടപടികള്‍ സമയബന്ധിതമായി പൂര്‍ത്തിയാക്കുന്നതിനു ഭഗീരഥപ്രവര്‍ത്തനം ആവശ്യമാണെന്നും ഇതിനായി ബന്ധപ്പെട്ട ഉദ്യോഗസ്ഥര്‍ സഹകരിക്കണമെന്നും ജില്ലാ കലക്ടര്‍ ഇ ദേവദാസന്‍ പറഞ്ഞു.  
ദേശീയപാതാ വിഭാഗം ചീഫ് എന്‍ജിനീയറും കെ.എസ്.ടി.പി പ്രൊജക്ട് ഡയറക്ടറുമായ കെ.വി പ്രഭാകരന്‍, ജില്ലാ കലക്ടര്‍ ഇ ദേവദാസന്‍, ഡെപ്യൂട്ടി കലക്ടര്‍മാരായ കെ അംബുജാക്ഷന്‍, ബി അബ്ദുള്‍ നാസര്‍, ദേശീയപാത അതോറിറ്റി ഓഫ് ഇന്ത്യയുടെപ്രതിനിധികളായ പ്രിന്‍സ് പ്രഭാകരന്‍, കെ.വി അബ്ദുല്ല, കെ സേതുമാധവന്‍ നായര്‍, പി അശോകുമാര്‍, പൊതുമരാമത്ത് എക്‌സിക്യൂട്ടിവ് എന്‍ജിനീയര്‍മാരായ പി കെ മിനി, സി സുരേഷന്‍, സിജി സുഗതന്‍, പി സുരേന്ദ്ര കെ.എസ്.ഇ.ബി ഡെപ്യൂട്ടി ചീഫ് എന്‍ജിനിയര്‍ എം.കെ നാരായണന്‍ എന്നിവരും പൊതുമരാമത്ത്, റവന്യൂ ഉദ്യോഗസ്ഥരും ബി.എസ്.എന്‍.എല്‍ പ്രതിനിധികളും സംബന്ധിച്ചു.