ചെറുതോണി: ശക്തമായ മഴയിലും കാറ്റിലും കെട്ടിടത്തിന്റെ മേല്‍ക്കൂര തകര്‍ന്ന് വൈദ്യുതി ലൈനിനുമുകളില്‍ വീണ് നേര്യമംഗലം-ഇടുക്കി സംസ്ഥാന പാതയില്‍ അരമണിക്കൂറിലധികം ഗതാഗതം തടസപ്പെട്ടു.
    ചെറുതോണി പ്രാഥമിക സഹകരണ കാര്‍ഷിക ഗ്രാമീണ വികസന ബാങ്ക ് കെട്ടിടത്തിന്റെ മേല്‍ക്കൂരയാണ് കാറ്റില്‍ പറന്നത്. ഇന്നലെ വൈകുന്നേരം ആറോടെയാണ് സംഭവം. മഴയും ശക്തമായ കാറ്റുമുണ്ടായിരുന്നതിനാല്‍ കാല്‍നടയാത്രക്കാരാരും റോഡിലുണ്ടായിരുന്നില്ല.
വാഹനങ്ങളും ഇല്ലാതിരുന്നതിനാല്‍ വന്‍ ദുരന്തം ഒഴിവായി. വൈദ്യുതി ലൈനിനുമുകളിലേക്ക് മേല്‍ക്കൂര തകര്‍ന്നുവീണ് ഇലക്ട്രിക് പോസ്റ്റ് ഒടിച്ചാണ് റോഡിലേക്ക് വീണത്. ഉടന്‍തന്നെ ഇടുക്കിയില്‍നിന്നും ഫയര്‍ഫോഴ്‌സും പൊലിസും വൈദ്യുതി ബോര്‍ഡ് ജീവനക്കാരുമെത്തി .വൈദ്യുത പോസ്റ്റ് ഒടിഞ്ഞതോടെ വൈദ്യുതി നിലച്ചിരുന്നു. ഇലക്ട്രിക് കട്ടര്‍ ഉപയോഗിച്ച് ഫയര്‍ഫോഴ്‌സ് ഉദ്യോഗസ്ഥര്‍ ടിന്‍ ഷീറ്റുനിര്‍മ്മിതമായ മേല്‍ക്കൂര അറുത്തുമാറ്റിയാണ് ഗതാഗതം പുനസ്ഥാപിച്ചത്.