മക്ക: ബില്ലടക്കാന്‍ പണമില്ലാത്തതിനാല്‍ ഒന്നരമാസമായി മക്കയിലെ ആശുപത്രി മോര്‍ച്ചറിയില്‍ സൂക്ഷിച്ച കണ്ണൂര്‍ തളിപ്പറമ്പ് പുളിയംപറമ്പില്‍ സ്വദേശി ഇസ്മാഈലിന്റെ മൃതദേഹം ഖബറടക്കാനുള്ള നടപടികള്‍ തുടങ്ങി.
ഉംറ നിര്‍വഹിച്ച ശേഷം മക്കയില്‍ കുഴഞ്ഞു വീണ ഇസ്മാഈലിനെ ആശുപത്രിയിലേക്ക് മാറ്റുകയും പിന്നീട് മരിക്കുകയുമായിരുന്നു. ആശുപത്രി പരിചരണമടക്കം വന്‍തുക ബാധ്യതയായതിനെ തുടര്‍ന്ന് പ്രതിസന്ധിയിലായ ഇദ്ദേഹത്തിന്റെ മയ്യിത്ത് ഖബറടക്കാനുള്ള നടപടികള്‍ക്ക് മക്ക കെ.എം.സി.സി പ്രസിഡന്റ് കുഞ്ഞുമോന്‍ കാക്കിയാണ് സഹായിച്ചത്. മുഴുവന്‍ ബാധ്യതകളും തീര്‍ത്ത് മയ്യിത്ത് മറവുചെയ്യുമെന്ന് കുഞ്ഞുമോന്‍ കാക്കിയ അറിയിച്ചു.
റിയാദില്‍നിന്നും ഉംറക്കെത്തിയ ഇസ്മാഈല്‍ ഹറമില്‍ കുഴഞ്ഞ് വീണതിനെതുടര്‍ന്ന് മക്കയിലെ കിങ് അബ്ദുല്‍ അസീസ് ഹോസ്പിറ്റലില്‍ പ്രവേശിപ്പിക്കുകയായിരുന്നു. മരിച്ച ശേഷം ആരുടെയും ശ്രദ്ധയില്‍പെടാതെ ഒന്നരമാസത്തോളം മൃതദേഹം ആശുപത്രിയിലെ ഫ്രീസറില്‍ കിടക്കുകയും ചെയ്തു. മരണവിവരം പുറത്തറിയാനും വൈകി.ആശുപത്രി രേഖകളിലുള്ള 25,000 റിയാലോളം (475616 രൂപ) ബില്‍ അടച്ചാല്‍ മൃതദേഹം വിട്ടുകൊടുക്കുമെന്ന് നേരത്തെ അധികൃതര്‍ അറിയിച്ചിരുന്നു. എന്നാല്‍ തുക കണ്ടെത്താന്‍ കുടുംബം പാടുപെടുംബോഴാണ് സഹായമെത്തിയത്. ബാധ്യത തീര്‍ക്കാന്‍ വഴി തെളിഞ്ഞതോടെ എത്രയും പെട്ടെന്ന് ഇസ്മാഈലിന്റെ മൃതദേഹം മറവുചെയ്യാനുള്ള പ്രവര്‍ത്തനങ്ങളിലാണ് കെ.എം.സി.സി പ്രവര്‍ത്തകര്‍.