എടക്കര: വേനല്‍ കനത്തതോടെ വന്യമൃഗങ്ങള്‍ വെള്ളത്തിനായി കൂട്ടത്തോടെ നാട്ടിലിറങ്ങുന്നത് തടയുന്നതിന്റെ ഭാഗമായി വനംവകുപ്പ് കാട്ടിനുള്ളില്‍ കുളംകുഴിക്കാന്‍ തുടങ്ങി. കരിയം മുരിയം വനമേഖലയില്‍പ്പെട്ട നീണ്ട പൊയില്‍, മുണ്ടപ്പൊട്ടി എന്നീ മേഖലകളിലാണ് കുളത്തിന്റെ പണികള്‍ തുടങ്ങിയത്.
വന സംരക്ഷണ സമിതിയുടെ നേതൃത്വത്തിലാണ് പണികള്‍ പുരോഗമിക്കുന്നത്. മലയോര മേഖലയില്‍ വന്യമൃഗങ്ങളുടെ ശല്യം കുറക്കാന്‍ ഇതിലൂടെ കഴിയുമെന്നാണ് വനം വകുപ്പ് കണക്ക് കൂട്ടുന്നത്. വേനല്‍ കനത്തതോടെ വന്യമൃഗങ്ങള്‍ നാട്ടിലേക്ക് ഇറങ്ങുന്നത് പതിവായിരുന്നു. കരിയം മുരിയം വനമേഖലയിലെ ഉണിച്ചന്തം, പള്ളിപ്പടി, അറണാടംപാടം, പാലേമാട് ,മുണ്ടപ്പൊട്ടി, എന്നീ പ്രദേശങ്ങളില്‍ കര്‍ഷകര്‍ക്ക് ആനശല്യം തുടര്‍ക്കഥയായിരുന്നു. കഴിഞ്ഞ ദിവസമിറങ്ങിയ ആന ചുങ്കത്തറ ടൗണില്‍ വരെ എത്തി നിരവധി നാശനഷ്ടങ്ങള്‍ വരുത്തിയാണ് കാട് കയറിയത്. വെള്ളത്തിനിയി കൂട്ടമായിറങ്ങുന്ന ആനകള്‍ നിരവധി കാര്‍ഷികവിളകളും നശിപ്പിച്ചാണ് മടങ്ങാറ്. വന്യജീവികളുടെ വെള്ളക്ഷാമത്തിന് ശാശ്വതമായ പരിഹാരമാണ് കുളംകുഴിക്കലിലൂടെ ലക്ഷ്യം വക്കുന്നത്. ജെ.സി.ബി ഉപയോഗിച്ചാണ് പണികള്‍ പൂര്‍ത്തിയാക്കുന്നത്. ഒരു കുളം കുത്തുന്നതിനായി എഴുപതിനായിരം രൂപയോളം ചെലവ് കണക്കാക്കുന്നുണ്ട്. വരും ദിവസങ്ങളില്‍ പാലേമാട്, പന്നിച്ചോല എന്നി പ്രദേശങ്ങളിലെ വന മേഖലയിലും കുളങ്ങള്‍ കുത്തുമെന്ന് വന സംരക്ഷണ സമിതി പ്രവര്‍ത്തകള്‍ അറിയിച്ചു.