മുക്കം: സര്‍ക്കാര്‍ ഉത്തരവുകളിലെ വൈരുധ്യവും അവ്യക്തതയും മൂലം നട്ടംതിരിഞ്ഞ് മുക്കം നഗരസഭയിലെ പെന്‍ഷന്‍ ഗുണഭോക്താക്കള്‍. കഴിഞ്ഞ യു.ഡി.എഫ് സര്‍ക്കാറിന്റെ കാലത്ത് ക്ഷേമനിധി ബോര്‍ഡിന്റെ പെന്‍ഷന്‍ വാങ്ങുന്നവര്‍ക്ക് മറ്റൊരു സാമൂഹ്യ സുരക്ഷാ പെന്‍ഷന്‍ കൂടി ലഭിക്കുന്നതിന് അവസരമുണ്ടാക്കിയിരുന്നു. എന്നാല്‍ തുടര്‍ന്ന് വന്ന എല്‍.ഡി.എഫ് സര്‍ക്കാര്‍ ഒരാള്‍ക്ക് ഒരു പെന്‍ഷന്‍ മാത്രമേ ലഭിക്കൂ എന്ന ഉത്തരവിറക്കി.
എന്നാല്‍ കഴിഞ്ഞ ദിവസം വന്ന ഉത്തരവിന്റെ അടിസ്ഥാനത്തില്‍ സ്വന്തം ഫണ്ടില്‍ നിന്ന് പെന്‍ഷന്‍ നല്‍കുന്ന ക്ഷേമനിധി ബോര്‍ഡില്‍ നിന്നും ക്ഷേമനിധി കൈപ്പറ്റുന്നവര്‍ക്ക് ഏതെങ്കിലും ഒരു സാമൂഹ്യ സുരക്ഷാ പെന്‍ഷന്‍ കൂടി ലഭിക്കുമെന്നും ഇതിനായി ജനുവരി 30 ന് രാവിലെ 10 മണി മുതല്‍ നഗരസഭ പെന്‍ഷന്‍ അദാലത്ത് നടത്തുമെന്നും ഗുണഭോക്താക്കളെ അറിയിച്ചിരുന്നു. ഇതിന്റെ അടിസ്ഥാനത്തില്‍ അദാലത്തില്‍ പങ്കെടുക്കാനെത്തിയവരെ നിരാശപ്പെടുത്തുന്ന വിധത്തിലായിരുന്നു അടുത്ത ഉത്തരവിറങ്ങിയത്. നിലവില്‍ വികലാംഗ പെന്‍ഷന്‍ വാങ്ങുന്നവര്‍ക്ക് മാത്രമേ രണ്ടാമതൊരു പെന്‍ഷന് അപേക്ഷിക്കാന്‍ അര്‍ഹതയുള്ളൂ എന്നായിരുന്നു പുതിയ ഉത്തരവ്. നഗരസഭയുടെ അറിയിപ്പ് വിശ്വസിച്ച് കൃത്യ സമയത്തു തന്നെ പെന്‍ഷന്‍ വാങ്ങാനായി മുക്കം ഇം.എം.സ് ഓഡിറ്റോറിയത്തിലെത്തിയ ഗുണഭോക്താക്കള്‍ നിരാശരായി മടങ്ങുകയായിരുന്നു.  വാര്‍ധക്യത്താലും രോഗത്താലും വലയുന്ന പെന്‍ഷന്‍ ഗുണഭോക്താക്കളെ വലച്ച നടപടിയില്‍ പ്രതിഷേധവും ഉയര്‍ന്നിട്ടുണ്ട്.